Roksta autors: Ināra Volkova, žurnals “A12”

Mežryupnīceiba ir vīna nu svareiguokūs Suomejis uzjiemiejdarbeibys nūzaru. Ka saleidzynoj ar Latgolu, tod Latvejā mežainuokī nūvodi ir Vydzemē i Kūrzemē, bet Suomejā vysaktivuok mežus izstruodoj zīmeļu regionūs. Pīrūbežys Kuhmo ari vadūšuo nūzare ir mežsaimnīceiba i kūkryupnīceiba. Eipaši teik dūmuots par jaunuokajom i videi draudzeigom tehnologejom kūka apstruodē i kūkizstruoduojumu izgataveišonā.

Kuhmo dorbojās dizaina i inovaceju centrys “Woodpolis”. Centrā kūpdorbojās uzjiemieji, zynuotniskuos institucejis i Alto universitatis vuiceibspāki, kab kūka izstruoduojumim radeitu augstuoku pīvīnuotū vierteibu, eipaši iztureigys kūka konstrukcejis i syltus paneļus dzeivojamūs sātu konstrukcejom. Inovaceju centra modernais apreikuojums, CAD CAM datorprogramys teik izmontuotys myužizgleiteibai, tei ir apvuicebu vīta specialistim i uzjāmumu darbinīkim kūkapstruodis nūzarē. Te ir ari nalela biznesa inkubatora vīta, kab īdzeivuotuoji varātu suokt uzjiemiejdarbeibu. “Woodpolis” centrys ir izstruoduojs i izveiduojs ekologiskūs cīmateņus Helsinkūs i kūka bloku sātys Raumys piļsātā.

Kuhmo piļsātys dūmis vadeituoja Tutti Maata pastreipoj, ka jau itūšaļt na viņ vaļsts centrys i golvyspiļsāta Helsinki, bet ari nūmalis ir pīdzeivuojušys ekonomiskū izplaukumu. Niule svareiguokais vaicuojums ir par dorbaspāka tryukumu. Iz pīrūbežu Kuhmo brauc struoduot nu Pūlejis i Baltejis vaļstim. Natuoli nu Kuhmo ir tramvaju ražūtne, tī ir vajadzeigi matynuotuoji, pādejā laikā jamā struodoj viņ uorzemnīki, Suomejā itūs specialistu tryukst. Koč ari ražuošona aizjam vys leluoku nūzeimi tautsaimnīceibā, tok vīnlaikus teik pīgrīzta viereiba taidom tehnologejom, kurys ir videi saudzejūšys, īdzeivuotuojim mozuok kaiteigys i ekologiskys.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.