Roksta autors: Ināra Volkova, žurnals “A12”

Vēļ da 21. janvara muokslinīki ir praseiti padūt sovus dorbus, kab dasasaceitu daleibai konkursam “Jāzepa Pīgožņa balva Latvijas ainavu glezniecībā”. J. Pīgoznis ir vīns nu atpazeistamuokūs Latvejis ainavistu. Bolva tyka īdybynuota piec muokslinīka nuovis, kab veicynuotu muokslinīku interesi atveiduot Latvejis dobu i izcaltu Latvejis ainovu gleznīceibys nūzeimi myusu dīnu muokslā.

J. Pīgožņa bolvu Latvejis ainovu gleznīceibā 2015. godā īdybynuoja Preiļu nūvoda dūme i Reigys dūme sadarbeibā ar Reigys pošvaļdeibys kulturys īstuožu apvīneibys Reigys Sv. Pītera bazneicys puorvaļdi, Preiļu Viesturis i lītiškuos muokslys muzeju, Latvejis Zynuotņu akademeju, Latvejis Muokslys akademeju, Jāņa Anmaņa Jaunūs talantu atbolsta fondu, i idejis autorim – kinorežisoru i gleznuotuoju Juoni Streiču, i muokslinīkim Jāni Anmani i Jāni Strupuli. 2015. godā golvonū bolvu sajēme Latvejis Universitatis profesors, muokslinīks Roberts Muzis, 2016. godā – muokslineica Silva Linarte, bet paguojušajā godā – Juoņs Plivda.

Dorbi padūdami Reigys Sv. Pītera bazneicā, dorba dīnuos nu 10.00 da 17.00. Teik gaideiti gleznīceibys dorbi eļlis, akvareļa, temperys, akrila ci pasteļa gleznuojuma tehnikā. Dorbu padevieji teik praseiti jimt vārā tū, ka izstuode ir ceļojūša i pajimtī dorbi pavasarī tiks eksponāti Reigys Sv. Pītera bazneicā, bet rudinī dorbus varēs apsavērt Preiļu Viesturis i lītiškuos muokslys muzejā.

J. Pīgožņa bolvys Latvejis ainovu gleznīceibā golvonuos bolvys pretendenti tiks paziņuoti izstuodis atkluošonā Reigys Sv. Pītera bazneicā 2019. gods 19. martā, juos īgiviejs byus zynoms rudinī, izstuodis atkluošonā Preiļūs.

Roksts sagataveits sadarbeibā ar portalu lakuga.lv ar Vaļsts regionaluos atteisteibys agenturys finansialu atbolstu nu Latvejis budžeta leidzekļu projektā “Robežlīnijas”.