Ka ir skaisti, tys tok ir pateikami! Saruna ar dizaineri Inesi Krivmani

Ka ir skaisti, tys tok ir pateikami! Saruna ar dizaineri Inesi Krivmani

Ar Inesi Krivmani sasarunuoja Edeite Husare

Tys beja vēļ pārnejais gods, bet aiz lūga taipat jau vyss kruosuojuos bolts. Sasatikšonys laiks – dīnys vyds, jo tim, kurim sovs režims, stuņžu skaiteišonai cyta sistema. Par tū byušonu bez konkretu dorba stuņžu, struoduošonu sev, par dizainu i vīnradžim saruna ar dizaineri Inesi Krivmani. Inese ir nu Kuorsovys, zeimiejuse ari portala lakuga.lv jaunū logo, bet niu ar draudzini kūpā sataisejuse apgierbu zeimulu “Eat My Unicorn”.

Kai ir byut frīlanseram* Latgolā?

Ruodīs, ka ir sovaižuok nikai, par pīmāru, Reigā, jo itaidā nūzarē, dizainā, vīns nu golvonūs faktoru ir kontakti, kod tevi zyna, īsoka tuoļuok. Puorsvorā muni klienti ir nu Reigys, Latgolā viņ puora pošvaļdeibu, nu i lakuga.lv. Kod tu nu regiona kaidam Reigā pīroksti, ka esi taids i taids, vari tū i tū, tod ir izbreins “Kas tu taids?” i paīt ilguoks laiks, cikom tevi īpazeist, jo tu esi nu Latgolys, tevi nazyna. Leluokuo atškireiba, ka ite tu esi vīns pats, bet Reigā leluokā burzeņā – storp dizainerim, cytim frīlanserim, rūnās tī kontakti.

Ite sēdi sātā vīns i raugi nazkai cytim par sevi izstuosteit. Par frīlanseru es klivu vosorys vydā, kod aizguoju nu dorba. Guoju taidā kai uzbrukumā Reigys reklamys i sabīdryskūs attīceibu agenturom, jo tom jau ir klienti, tuos jādz struoduot, ir pīredze ar jim, zyna, kū praseit. Latgolā eisti nazynu taidys. Ruodīs, ka vīna Daugovpilī ir, bet navarieju atrast par tū nikaidys informacejis. Latgola ir forša vīta, kur atsateisteit – byut pyrmajam sovā sferā, kuruos vēļ ite nav.

Deļ kuo izdūmuoji, ka struoduosi poša sev. Tovs īprīškejais dorbs beja pošvaļdeibā, daudzim tys ir sapyns…

Muna izgleiteiba ir sabīdryskuos attīceibys i reklama. Ite juosuoc nu poša suokuma ar tū, ka nu Reigys Latgolā atsagrīžu ar dūmu, ka struoduošu dizainā. Jau tod pyrma daudzu godu ar draugu sataisejom sovu radūšu agenturu, bet tys beja cyts laiks i sfera nabeja cik atteisteita, pīredzis mozuok i ar ļaudim nu Latgolys cīši nivīns nagribieja sasadorbuot. Ar kolegi Juri suocem dūmuot, ka jau dzeivojam iz vītys, tod vide ari pošim juoveidoj – taisejom pasuokumus, bejom aktivi (kai Kuorsovys jaunīšu bīdreiba “Pūga” – EH), vieduojom tū vidi, i tai pa mozeišam ar aktivitatem i dorbu īsleidieju pošvaļdeibys dorbā. Suokumā esi troks i energejis pylns, piečuok tev aplauž radzeņus, energeja beidzas i saprūti, ka vaira navari. Daudzim tys ir sapynu dorbs, bet munai personeiba nav pīmāruots. Kod vacuokim kaids vaicuoja, kur meita struodoj, iz atbiļdi, ka pošvaļdeibā, vysod beja taids: “Jezus, cik labi! Labi īsakuortuojuse, kur vēļ lobuok!” Māmu godu siļdeju itai sovai frīlansera byušonai. Dūmuoju, ka pagaisynuot nav kuo – paraudzeišu kai aizīs. Cikom izaver, ka aizguoja! Niu asu atsuokuse cept kūkys, nūtraust putekļus fotoaparatam – kasdīnys dorbā tys beja palics molā, nabeja spāka i gribiešonys. Niu otkon atsagrīž radūšuo prīca.

Voi tev ir bejuse dūma atsagrīzt Reigā, kur itamā sferā vīgļuok?

Interesanti saīt, ka muni vacuoki dzeivoj Reigā, asu tī bīži, bet kotru reizi saprūtu, ka tei nav muna “stiheja”. Jau studeju laikā maņ ruodejuos juos gona, gribiejuos iz Latgolu. Kusteibu es daboju cytaižuok – maņ vajag puorsavītuot, koč kur nūbraukt. Izmontoju īspieju nūbraukt iz tū pošu Reigu, braucu leidza draugam, kurs ir byuvnīks, iz dažaidom Latgolys piļsātom. Tys cikom ir leluokais minuss struodojūt pošam sev, ka tai i esi vīns ar sevi. Bet maņ vajag jaunus īspaidus, jaunu energeju!

Kai Latgolā vyspuor ir ar dizaina sferu i seve populariziešonu?

Nu, regionā vyss nav cik atteisteits. Deļ tuo ari maņ pateik struoduot ari reidzinīkim, kurim ir vaira izpratnis par tū pošu dizainu. Na vysod tū logotipu vajag leluoku! Mes taidi drupeit īsyunuojuši. Bet tys tik zeimoj, ka vajag struoduot, kustynuot iz prīšku, vuiceit ari klientu. Maņ gon reizē juosaprūt, ka klients ari zyna, kū puordūd, juorauga atrast eistais dizaina pīduovuojums.

Kas tevi pošu īdvesmoj dizainā? Kur sagiun zynuošonys, īdviesmi, aktualuos teņdeņcis?

Es daboju cīši lelu prīcu nu dizaina kai taida. Asu kai taids dizaina narkomans! Kod ir kaids breivs breids, siežu dažaiduos sātyslopuos, verūs, kas jauns i aktuals. Kū ta īraugu i poša pi seve dūmoju: “Ot, koč kū taidu maņ ar sataiseit! Koč atītu kaids klients, kuram taida vajadzeiba.” Eistineibā, tai i ir – kū sarežgeituoks aizdavums, tū leluoks spors i energeja pi dorba, leluoks izaicynuojums. Asu gotova koč naktim struoduot, kab izdareitu. Nu tai, ka cīši, cīši, cīši pateik tys, kū doru! Kotrys klients ari ir kai mozs izaicynuojums, kurs juouzmiņ.

Voi tev ir kaids sapyns, kū profesionali grybātu izdareit, sataiseit?

Koč kod iz prīšku tei nūteikti varātu byut sova mozuo radūšuo agentura, kurymā salaseit spieceiguokūs Latgolys jaunīšus. Dažus jau asu nūsavāruse. Latgalīšim ir cīši loba radūšuo humora izjiuta, čiulim taidys nav! Maņ ruodīs, ka tys mums byutu juoizmontoj. Kai īprīšk runuojom, ka Latgolā agenturys nav, tys nanūzeimej, ka tod navar byut, ka i nikod navajadzātu. Regions ari vys tik atsateista. Gribīs jau, kab ari ite saprūt, ka logotips navar moksuot 20 eiro, ka tys nav mozs zeimiejums, kurū var internetā nūpierkt, bet gon vasals stuosts. Iz tū ir juoaug!

Pastuosti par sovu vīnradžu projektu… (kod runuojom, tikū tikū beja pasaruodejs – EH)

“Eat My Unicorn” (Apēd munu vīnradzi – EH) ideja roduos kūpā ar munu draudzeni Laini Šicāni, kurei ari dzeivoj Kuorsovā. Jei beja tikū palykuse stuovūklī i saprotuse, ka eisti nav apgierbu pīduovuojuma tūpūšajom mamom. Nav jau tai, ka vysu laiku asi bejuse, par pīmāru, troka meitine, ar raksturu i tod, kod palic stuovūklī, pieški kliusti cytaižuoka – juovalk driebis ar pučeitem, luoceišim i tai. Tu vēļ arviņ esi tu poša tik ar vādaru. Var jau pasyuteit internetā, bet tī ari nikod navar nikuo zynuot, precis var atīt tod, kod jau esi klivs cik izmāru leluoks. Laine stuoseja, ka grybātu ražuok T-kraklus i mameņu kraklus, bet najādz zeimēt dizainus. Bet tū tok jādzu es! Suocem par itū dūmuot vosorys suokumā, bet saprotom, ka nav vyss cik vīgli – pošys izstruodojam apdrukys dizainus, t-kreklu, kurus šyun tīpat Kuorsovā, dizainus.

Apdrukys kraklim ir taidys smīkleigys, ar humoru. Juoizbauda ari itys laiks skaisti! Par pasyutejumim asam cīši prīceigys. Nazkur Feisbukā redzieju īrokstu: “Kod tu pasyuti pi mozuo uzjiemieja, jis doncoj.” Tai i mums ir. Ar laiku pasaplašynuosim, byus ari koč kas veirīšim, byus ari interneta veikals. Nūsaukumu gribiejom taidu rokeigu, palaidneigu, napareizu. Dūmuojom, dūmuojom i tod Laine izdūmuoja. Saguoja gon bierniškeigs, gon rokeigs, taids “verīs, ite ir muns breinums, paraugi tū!”.

Karteite: Ineseis Krivmanis personeigais arhivs.

Tovuos rūkuos i golvā tope ari portala lakuga.lv vizualuos ideņtitaitis puormainis. Kaids ir tovs stuosts itam projektam?

Tys beja taids cīši dorbu pylns laiks, suokumā beja dūma par logotipa atjaunynuošonu, bet, laikam īmūt, ar portala redaktori Vinetu saprotom, ka juotaisa vyss piļneigi jauns. Tys, kū suokumā runuojom, atsaškeire nu gola rezultata. Ari cikom atrodem eistū kruosu. Logo stuostā beja juoīkodej dūma, ka latgaliskais ir daļa nu vysa pasauļa. Maņ pošai pateik i ceru, ka īsadzeivuos iz prīšku. Nu tuo pasauļa īt tī mozī latgalīšu burbuleiši!

Kai tu radzi latgaliskū uzjiemiejdarbeibā – voi latgaliskuo ideņtitate dizainā paleidz?

Maņ ruodīs, ka nūteikti paleidz! Tū tok var redzēt – ka pat Reigā leluos agenturys taisa reklamys latgaliski. Nu ir koč kas taids latgalīšim, ka gribīs i aizīt! Tik cyts stuosts ir par praseibom. Satyku vīnu klientu, latvīti, kurs dzeivoj Honkongā, syuta iz tīni latvīšu precis. Jis atzeist, ka mums, latvīšim, ir zamys praseibys pret dizainu, bet Honkongā ļauds ir gotovi pierkt vysu, kam ir stileigs dizains i padūmuots pi vysu seikumu. Mums tuo vysa vēļ nav, juoaug. Bet latgaliskais Latvejis mārūgā ir tys bonuss, kurs izsaun – kurs nūstruodoj iz auditoreju. Labi aizīt latgaliskais, bet tam juobyut i modernam. Cytaiž asam īsleidiejuši latgaliskajā, bet cīši vīnkuoršajā, vajadzātu vys tik atsateisteit. Saprūtu, ka tei ir sova veida “myusu līta”, bet deļ kuo, pīmāram, Latgolā vysys piertenis ir nu kūka baļču? Ir laiks kuopt jaunā leiminī. Ka ir skaisti, tys tok ir tik pateikami! Skaistums veicynoj ari puordūšonu, tymā ir vārts īguļdeit.

Inesis īsacejumi tim, kurī gryb suokt struoduot poši sev:

  1. Vari struoduot, kur, kod i cik daudzi gribi. Eipaši labi var izmontuot byušonu ceļā.
  2. Disciplina. Minuss i reizē izaicynuojums – asūt frīlanseram, juobyut lelai pošdisciplinai.
  3. Nasabeit sevi reklamēt i par sevi stuosteit. Ka nastuosteisi, cyti naizzynuos, kū vari i dori.
  4. Nasabeit nu tuo, ka ar klientu naesit iz vīna viļņa. Tys ir normali. Ar kaidu sakreit energejis i virzīņs, ar kaidu nā.
  5. Dorbs ir dorbs. Reizem koč kas, kū pasyuta dareit, pošam var napatikt voi ruodeitīs nainteresants, bet ir juopadora.

*Darbinīks, kurs struodoj uorpus biroja i olgu sajem atkareibā nu padareituo.

Roksts sagataveits ar Vaļsts regionaluos atteisteibys agenturys finansialu atbolstu nu Latvejis vaļsts budžeta leidzekļu.