Ituo pavasara nūtikšonys i nūskanis – Marijis Dzeislys dzejā

Ituo pavasara nūtikšonys i nūskanis – Marijis Dzeislys dzejā

Rokstu sagataveja: portals lakuga.lv

Itys ir trešais Marijis Dzeislys dzejis publiciejums portalā lakuga.lv.

aiztaisi muti pa mozam gabaleņam
pa mozai rumceņai izdzer klusuma
apleik nivīna
sovejī teiklūs kai ziernyukli karinej gaida
laika laivys kai myusys pluovoj pa iudinim
airi iudinī: like like like
breineigā pasaulī breineigi smaidi i kars
tī tuoli tuoli tuoli
a mums ir ministre
a mums ir pavasars
krokusi ūlenis pārnejī Leldīņu rūtuojumi iz golda
a tomati sadeigst iz palūdžu
a kači pliešās aiz lūga
komentaru kari pa mazeņam kluseņam
dataisi muteiti pasmaidi muoseņa
cmuki

ka nivīna vairs nabyus, nabyus nivīna
Dīvs izīs iz gaņku dabasūs
atsasēss, vērsīs i klusēs
kopeja krūzē atdziss, izmierks capumi vokora rosā
tik vabalis ruopuos
Dīvs dūmuos
ar kū voguls atsaškir nu vabalis
i kur beja pruots radeit tik daudzi volūdu
ka niu nav nivīnys

ar skaudzi pīkriešu pylnus rotus
bumbīri grušys vīšnis kirši agristys ierškeižys šlivys plūmis uobeli avīšys
celofana kuleitēs vysu kuorteigi salyku, aizsieju golus
apdūmoj labi, voi tovai kuleitei byus ūtrys pīlītuojums
durakam i kule par zvonu

diveji dybyni diersa dyuni
nu TV ekrana
diskusejis
vīns lyzguoja ūtram ūlys, trešs samoksuoja
diveji dyrbyni dyuce par dzeivi
dadzynuoju papeira lidmašynys i svīžu pa lūgu
varbyut sābrim byus vaļā lūgi
aiz vysu lūgu ekrani
aiz vysu ekranu lūgi

korespondenti Briselē žuovuojuos
es žuovuojūs leidza
gaidu nu Anglejis paceņu
beja izdeveigi tarifi

izviemu vasalu albumu paguotnis fotografeju
Vacreigys ūļneicā iz bruģa izapluoja
būrkuoni ar sienim, nazkas zaļš, velveta žaketeite, kūrpis iz platformys, bierneibys basanožkys
Metallica krekleni, bārbejis lele bez kuojis, kedys Adibas, kepons ar eņgeli, kuopusti
par reizis palyka vīgļuok

puorguoja vysi kongresi
betona plituos saauga zuole
Trasuns apsagrīze iz ūtra suona
baba nūmyra i pajēme grobā “Katōļu Dzeivi”
dzeive kai dzeive
Vipingā vyss mīreigi
tik Kairišs taisa kinu

kai mikroleņtē puorsleid vysi paguotnis nūtykumi
kai bez briļļu verūs iz svešūs ļaužu seju
sveši svātki sveši nūtykumi
nazkod itai mes vysi kur kurais pagaissim paguotnis mieslīnī

03.04.2019.

Nūtikšonu kalendars