Vareiba realizēt radūši pedagogisku ideju

Vareiba realizēt radūši pedagogisku ideju

Roksta autors: lakuga.lv

Austrumlatvejis radūšūs pakolpuojumu centrs “Zeimuļs” aicynoj pedagogus padūt interešu izgleiteibys programys (dokumentu, kurā paruodeita planavuotuo procesa gaita), kurys tiks realizātys 2019./2020. vuiceibu godā. Programu da 3. maja (īskaitūt) vajag atnest iz “Zeimuļa” 1.1. telpu. Kaida vareiba caur tū dabuot latgalīšu volūdys stuņdis?

Interešu izgleiteibys programu var padūt pretendents ar pedagogisku izgleiteibu. Ka kaidam ir augstuokuo izgleiteiba, bet jei nav saisteita ar pedagogeju, Rēzeknis Tehnologeju akademeja pīduovoj 72 stuņžu pedagogejis kursus, kur var dabuot vajadzeiguos zynuošonys i sertifikatu. Teik gaideitys i jau eistynuotuos, i jaunys interešu izgleiteibys programys.

Interešu izgleiteibys metodike Agita Gailiša par ideju sagataveit ar latgalīšu volūdu saisteitu interešu izgleiteibys programu: “Vyss atkareigs nu tuo, kas byutu tamā programā, ar volūdu viņ napītiks. Juobyun na viņ radūšam, bet ari labi juopuordūmoj saturs, ar kū pīsaisteit bārnus. Minimalais stuņžu skaits, kū mes dūdam, ir četrys. Tī var byut latgalīšu svātki, varbyut kulinareja, varbyut vysa latgalīšu kultura, varbyut vēļ kas cyts. Mes poši Latgolys kulturys projektu programai 2016. godā, ari itūgod asam padavuši ar Latgolys kulturu saisteitu projektu.

Programys izviertejūt, mes cīš veramēs, kab juos napuorsakluotu ar školys programu. Daudzi vacuoki prosa, parkū mums nav angļu volūdys. Bet mums navar byut taidys programys, tū vuica školā. Interešu izgleiteibys programai juobyun taidai, ka bārns var pīsavīnuot sevkurā laikā. Nav tai, ka septembrī tu grupu salaseji i tod struodoji vysu godu. Nā, kaids var pīsavīnuot decembrī, kaids var atkrist. Te nav škola, ka naradeisi interesi, bārns vīnkuorši vaira naīs. Ka nabyus bārnu, tai programai nav jāgys. Bet, ka ir loba ideja, parkū jū narealizēt?!”

Pi Agitys var sajimt konsultacejis par programu veiduošonu (ARPC “Zeimuļs” Krosta īlā 31, Rēzeknē 1.1. kab., t. 29507088, e-posts: agita.gailisa@rezekne.lv). Īsacejumus i metodiskuos rekomendacejis var atrast ari interneta vītnē:

https://visc.gov.lv/intizglitiba/dokumenti/metmat/ieteikumi_int_izgl_programmas_izveidei.pdf

Nūtikšonu kalendars