Arņam Slobožaņinam pyrmais soloalbums

Arņam Slobožaņinam pyrmais soloalbums

Rokstu sagataveja: portals lakuga.lv

26. aprelī škārsteikla muzykys vītnēs “Spotify”, “iTunes”, “Bandcamp” tiks publicāts Arņa Slobožaņina pyrmais soloalbums “Pasamūds puosokā”. 29. aprelī LNT raidejumā “900 sekundes” varēs dzierdēt albuma pošu veiksmeiguokū dzīsmi “Puosoka”, bet albuma prezentacejis pasuokums gaidoms 4. majā 22.00 stuņdēs Daugovpiļs klubā “Artilērijas pagrabi”.

Par soloalbuma veiduošonys gaitu stuosta A. Slobožaņins: “Albuma izīšona sakreit ar Latgolys kongresa dīnys svineibom, speciali izalaseju itū datumu. 26. aprelī, kod albums teik publicāts interneta vītnēs “Spotify”, “iTunes”, “Bandcamp”, ka kaidu interesēs, tīpat varēs albumu nūpierkt. Albumu veidoj vysaidu žanru i stylu 10 dzīsmis – pankroks, piļneiga popmuzyka, ambientuo muzyka. Kaids saceis – leidzeigs styls kai “Dabasu Durovom”, tūmār tuos vysys ir munys īceris. Itys albums roduos daudz vīgluok, daudz dreizuok par “Dabasu durovu” albumim. Solo albums ir solo albums, taiseju vysu, kai grybu.

Raudzeju kooperētīs ar daudzim muzykantim, pajimt jūs idejis, pamattemys, kurys jī maņ demonstrēja. Apaudzieju tuos temys i gols golā tykom pi dzīšmu. Juopīmiņ sadarbeiba ar basgitaristu Zurabi Ivanānu, ar gitaristu Vjačeslavu Filipovu, ar indī muzykys puorstuovi Elgaru Ludboržu, ari “Piparmētru” Janu Dudari i Amandu Lapu. Dzīsmis ir i latgaliski, i baltiski. Izmontuoju Ontona Slišāna i cytu latgalīšu autoru dzeju.

Nūsaukums “Pasamūds puosokā” ir salykts nu div dzīšmu – “Pasamūds” i “Puosoka”. “Pasamūds” simbolizej koč kuo jauna mekliešonu muzykā. Vysu laiku dori kū vīnu, munā gadejumā tuos beja “Dabasu Durovys”, tu pasamūsti i paraugi kū cytu. A “Puosoka” ir veiksmeiguokuo dzīsme nu albuma, maņ jei pošam vysvaira pateik.

Vosorā solo projekta lītys paraleli “Dabasu Durovom” turpynuošu. Mani dzierdēt byus vareiba ari Rēzeknis nūvoda dīnuos.”