Koncertizruode ar dzīdūšim veirim i Raibū

Koncertizruode ar dzīdūšim veirim i Raibū

Rokstu sagataveja: portals lakuga.lv

Pyrma Latgolys kongresa dīnys, kū itūgod 27. aprelī svynam pyrmū reizi, 26. aprelī, 18.00 stuņdēs Latgolys viestnīceibys GORS Lelajā zālē nūtiks koncertuzvaduma “Dzeivis graidi” pyrmizruode. Koncertizruodis golvonī varūni – kora “Graidi” dzīdūšī veiri i pyušamūs instrumentu orkestra “Rēzekne” muzyku grupa. Teicieja lūmā – latgalīšu literats i multimuokslinīks Oskars Orlovs (Raibīs), informej Latgolys viestnīceibys GORS (SIA “Austrumlatvijas koncertzāle”) Marketinga nūdalis vadeituoja Edīte Husare.

Izruodis idejis autors ir veiru kora “Graidi” dirigents Jānis Mežinskis, kurs, grybādams rūsynuot komponistus jaunu veiru kora dzīšmu radeišonai, itam dorbam uzrunuoja nazcik Latgolā dzeivojūšus komponistus. Niu radeitys desmit originaldzīsmis ar Ilonys Rupainis i Guntrys Kuzminys-Juknys muzyku i Inetys Atpilis-Juganis i Raibuo tekstim. 

Veiru kors “Graidi” darbeibu suocs 2009. gods janvarī i jau tuo poša goda martā pīsadaleja pyrmajā veiru vokalūs ansambļu konkursā Latvejā “Mēs tikāmies martā”, kur ījēme ūtrū vītu. Kors ar panuokumim regulari pīsadola Latvejis Republikys koru skatēs i Vyspuorejūs latvīšu dzīšmu svātku koru karūs, sevkuru godu reikoj koncertus i pīsadola festivalūs i Latvejā, i uorvaļstīs. Kora “Graidi” repertuarā ir i latvīšu klasiku skaņdorbi, i tautysdzīšmu apdaris i uorzemu komponistu dorbi, veiri regulari īsasaista ari vysaidūs muzykalūs projektūs, tūstorp 2012. godā izspālāta dzejis izruode “Piļsātā nikod napalīk tymss”, bet ituo gods pavasarī pīduovoj jaunu koncertizruodi “Dzeivis graidi”.

Nūsaukums “Dzeivis graidi” atkluoj koncertizruodis golvonū ideju – veiru radūšuo kūpdarbeiba, dzeivis ainys, pīdzeivuojumi i puordzeivuojumi ir kai kruosains dzeipurs dzeivis audaklā. Koncertizruodis radūšuo grupa – uzvaduma koncepcejis autore I. Rupaine, režisore Māra Zaļaiskalns, tārpu muokslineica Ināra Apele, kora “Graidi” dirigenti J. Mežinskis i Edgars Kārklinieks, koncertmeistars Einārs Lipskis, pyušamūs instrumentu orkestra “Rēzekne” dirigents Sergejs Sergejevs.

Īejis beleti iz koncertuzvaduma “Dzeivis graidi” pyrmizruodi nūpierkamys Latgolys viestnīceibys GORS i “Biļešu Paradīze” beletu sistemuos, beletu cenys nu 5,00 da 7,00 eiro, GORS Kulturys viestnīku programys daleibnīkim atlaide 30%. Jaunys dzīsmis veiru koru repertuaram rūnās, pasateicūt Rēzeknis piļsātys mozūs kulturys projektu finansialajam atbolstam, uzvaduma nūtikšonu atbolsta Vaļsts kulturkapitala fonds i Rēzeknis piļsātys dūme.