Rokstu sagataveja: portals lakuga.lv

Pīktdiņ, 3. majā, Daugovpiļs nūvoda Vyškūs, pogosta Sabīdryskajā centrā, pyrmū reizi nūtiks daņču i rūtaļu vokors. Pasuokumā praseiti pīsadaleit i tī, kurus jau ir aizruovuši daņči, i tī, kurim ir interese i gribiešona īsavuiceit kū jaunu ci atsaguoduot labi aizmierstu vacū, informej projekta “Radītu, lai paliktu” koordinatore Jeļena Žukova.

Pasuokums suoksīs 18.00 stuņdēs ar rūtaļom, kurys vadeis Rasma Igaune ar saimi, Naujinis pamatškolys folklorys kūpa “Mazā Rūžeņa” i Salakys folklorys kūpa nu Leitovys. Sovutīs nu 20.00 da 23.00 stuņžu byus daņči lusteigys tautys muzykys skaņuos kūpā Daugovpiļs nūvoda folklorys kūpom “Dyrbyni” i “Speiga” i Preiļu nūvoda Saunys pogosta folklorys kūpu “Naktineica”.

Rūtaļu i daņču specifika ir taida, ka sevkurs var doncuot leidza, nauzatraucūt par pareizim sūlim, partū ka golvonais ir doncuotprīca, sovstorpejuo komunikaceja daņčūs i rūtaļuos, prīcys pylna atmosfera i dzeivuo muzyka.

Pasuokumā īeja ir bez moksys, leidza ir juopajem ārti mainis apovi doncuošonai, dzaramais iudiņs i nalels gastiņcs pi čaja.

Dūma par Daņču i rūtaļu vokoru Vyškūs roduos Daugovpiļs nūvoda Kulturys centra “Vārpa” folklorys kūpys “Dyrbyni” daleibnīkim, kuri regulari reikoj daņču vokorus i ir apmekliejuši daņču nakti Gikšūs i Pasvalē Leitovā.

Rūtaļu i daņču vokoru Vyškūs reikoj Daugovpiļs nūvoda Kulturys puorvaļde kai vīnu nu aktivitašu projektā Nr. LLI-337 “Zarasu rajona un Daugavpils novada mazaktīvo teritoriju iedzīvotāju radošuma un uzņēmējdarbības aktivitātes atbalstīšana, izmantojot sociālkultūras pasākumus” (“Radītu, lai paliktu”). Projekta vadūšais partners ir Zarasu rajona Kulturys centrs. Papyldu informaceja: Jeļena Žukova, +37125611544, jelena.zukova@dnkp.lv