Rokstu sagataveja: portals lakuga.lv

Ūtardiņ, 14. majā, 15.00 stuņdēs Latgolys Kulturviesturis muzejā (Atbreivuošonys alejā 102, Rēzeknē) nūtiks Viesturis šaļteņu pītura “Kopu kultura Rēzeknē”, informej Latgolys Kulturviesturis muzeja specialists kulturviesturis vaicuojumūs Kaspars Strods.

Nazcik godu symtu garumā Rēzeknē ir izaveiduojušys vysaidys kopsātys, kurys myusdīnuos ir naatjamama piļsātys kulturviesturiskuos ainovys sastuovdaļa. Koč ari kasdīnā ituos vītys pamatā asociejās kai myrušūs myuža sātu, tok vīnlaikus juos ir “klusejūšuos” viesturis līcineicys, kurys globoj nūzeimeigu informaceju par myusu paguotni.

Vīna nu leluokūs i vacuokūs apbedejumu vītu piļsātā ir 18. g. s. beiguos izveiduotuo Rēzeknis ebreju kopsāta. Laika gaitā jei palykuse par svareigu kulturviesturis “globuotuoju”, kas myusu dīnuos stuosta par ebreju kūpīnys viesturi, volūdu, tradicejom i c. Daudzu godu garumā itū kopsātu i jamā asūšūs kopu akmiņus ir pietejuse filologejis doktore Dr. philol. Olga Senkāne, kurei īpazeistynuos ar sovu pietejumu atkluojumim. Pošu reizi ebreju kopsātys sakuortuošonā struodoj div breivpruoteigī nu Vuocejis – Martins i Harro, kuri ari sūlejušīs atīt iz viesturis šaļteņu pīturu i daleitīs sovā pīredzē.

Īeja pasuokumā: školānim, studentim – 1 eiro; pīaugušajim – 2 eiro. Pasuokuma laikā var tikt veikta fotografiešona, video i/ci audio īroksta veikšona.