Latgalīšu hiti, šovi, muokslys darbneicys festivalā “Seven Hills”

Latgalīšu hiti, šovi, muokslys darbneicys festivalā “Seven Hills”

Rokstu sagataveja: portals lakuga.lv

24. un 25. majā Rēzeknē nūtiks V storptautyskais muokslys i muzykys festivals “Seven Hills 2019”, aicynojūt baudeit muzykys, dejis, vizualū, vidis, skotivis, īlu i improvizacejis muokslu, informej pošvaļdeibys agenturys “Rēzeknes Kultūras un tūrisma centrs” reklamys specialiste Maija Upeniece.

Pīktdīnis vokorā – 24. majā – Rēzeknē festivāla “Seven Hills” koncertā “Latgalīšu hiti” uzastuos grupa “Žvūrgzdyni” (Rēzekne), “Gondreiž 10nīkā” (Kaunata), “Piparmētra” (Ilyukste), “Trešais Ņutona lykums” (Rēzeknis nūv.), “Latgalīšu Reps” (Ludza), “Dabasu Durovys” (Daugovpiļs), “Sovvaļnīks” (Rēzekne), Ūga/“Ausmeņa Records” (Rēzekne), “Stoptime Dance Studio” (Rēzekne), DJ Deila (Viļāni/Rīga) i DJ XYPO/LNDKID/DeepMixNation (Rēzekne/Lelbritaneja).

Sovutīs 25. maja vokorā koncertā “Pasauļa mīti” varēs izbaudeit nazcik gostu muzykalū snāgumu, kai Chris Noah (Reiga), “Triana Park” (Reiga), “Singapūras satīns” (Reiga), “The Glass” (Ukraina, Ļvova), “Bez Bileta” (Boltkrīveja, Minska), kai ari skateituojus prīcēs “Fire Show studio” guņs šovs (Daugovpiļs), muokslys i deju performance “Dance Box” (“Stoptime Dance Studio”, Rēzekne) i DJ Nonserious.

Festivala sastdīnē – 25. majā – guojieju promenadē i upis skverā otkon byus vareiba pīdzeivuot Dzeivūs skulpturu šovu, kurā itūgod pīsadaleis “Svorcāluojs” nu Spānejis, “Krāslys” nu Izraelys, “Zalta veirs”, “Vieja cylvāks”, “Mehaniskuo lele” nu Lelbritanejis, “Meitine-Fauns”, “Capurnīks” (nu L. Kerola stuosta “Alise Breinumu zemē”), “Snīga karalīne”, “Sudobra dāma”, “Čarlejs Čaplins”, “Pirats”, “Akvanauts” i “Kolumbine” nu Ukrainys, “Oldars”, “Kozlevičs” (nu I. Ilfa i J. Petrova romana “Zalta teļš”), “Kovbojmeitine Džuleja”, “Calms”, “Spūguļcylvāks”, “Atrībis eņgeļs”, “Stuņdinīku meistars” nu Boltkrīvejis i “Mežamuote” nu Latvejis. Konkursa skulpturys vērtēs žureja, bet apmaklātuojus prosa izalaseit sovu simpateju i nūbolsuot par meiļuokū dzeivū skulpturu, noskenejūt QR kodu pi skulpturu.

I 24., i 25. majā guojieju promenadē i pi Latgolys viestnīceibys GORS nūtiks eksperimentaluos muokslys darbneicys, storp jom ari Elitys Patmalniecis radūšuo darbneica, kur sevkuram byus vareiba sajimt sova portreta skici, kū iz vītys izzeimiejuse Elita. Taipat aizraujūša sūlejās byut ari Grietys Butjankovys (Rēzekne) sītspīdis radūšuo darbneica “Režica senajās fotogrāfijās” ci radūšuo darbneica bārnim “Varavīksne”, kur saime kūpā varēs rast prīcu i īdvesmi jaunom idejom.

Emocejis sprakstēs, vārojūt i aizrauteigū īlu cyrka šovu “Ulalā!” (Franceja, “Sypocircus”), kur cyrka muokslinīks Silvēns Pomme demonstrēs vysaidys žongliešonys tehnikys, brauks iz miļzeiga vīnritiņa, jūkuosīs i ar reibynūšim trikim īprīcynuos kai mozus, tai lelus skateituojus, i laikmeteigū cyrka izruodi “Motosikai” (Suomeja, “Race Horse Company”), kas puorsteigs ar žonglerim iz kolnu slēpem, lidojūšim akrobatim i eistu kiborgu!

Pasauļa kruosys atspaituos lelūs i mozūs Mārtiņa zīpu burbuļūs (Reiga), partū bārni var jimt leidza tukšūs zīpu burbuļu trauceņus, kurymūs varēs īlīt Mārtiņa Burbuļu breineigū zīpu škeistumu. Taipat paradzātys naaizmierstamys Holi kruosu dejis sadarbeibā ar “Stoptime Dance Studio”, kod 150 bārni i jaunīši īraus skateituojus kruosu šovā i neona gaismuos.

Prūtams, festivals īsaspeidēs ari Rēzeknis piļskolnā, kur itūreiz muokslys i muzykys performance “Save the Galaxy” atkluos bezgaleigū kusteibu – vierzeitīs iz prīšku mierktīceiguok i augšuok. Muzyka i kosmoss ir cīš plaši, kū festivalā skateituojim raudzeis dziļuok atkluot muokslinīki elektroniskuos muzykys koncertā – Rēzeknis piļskolnā muzicēs “Tehnikums”, “Podruga”, Mntha, Elizabete Balčus, “Tesla Valium”, “Gas Of Latvia” un “Monvol”.

Muokslys i muzykys festivals “Seven Hils” nūteik sevkuru ūtrū godu i simboliski stuosta par Rēzeknis septenim dzeivim i laikmeteigim pakolnim, kuri sevi paruoda vysaiduos myusdīnu eksperimentaluos muokslys izpausmēs. 

Pīsavīnoj i ļaunīs muokslys breineibai Rēzeknē! Pasuokuma programa apsaverama ite.

Festivala laikā dorbuosīs ari tiergs. Pasuokumā nūtiks fotografiešona/filmiešona, deļ reklamys materiali tiks publicāti.

Print Friendly, PDF & Email