LRT veiduos sižetus latgaliski

LRT veiduos sižetus latgaliski

Rokstu sagataveja: portals lakuga.lv

Da ituo gods beigu storp Latgolys regionaluos televizejis (LRT) veiduotajim ziņu sižetim par aktualitatem vysaiduos nūzarēs, veiksmis i personeibu stuostim byus īkļauti pīci sižeti latgalīšu volūdā. Atbolsts sižetu izveidei taišni latgalīšu volūdā dabuots Latvejis Vaļsts mežu i Vaļsts kulturkapitala fonda atbaļsteitajā “Latgolys kulturys programys 2019” projektu konkursā, informej LRT žurnaliste i projekta vadeituoja Ausma Sprukte.

Žurnalistis Ausmys Spruktis raksteitais projekts “Latgolys kultura = identitate, volūda, jaunrade TV ekranā” konkursā sajēme finansiejumu 1861 eiro apmārā i paredz sižetu latgalīšu volūdā izveidi par ituo poša konkursa cytim pīcim laureatim, kas itūgod Latgolā organizēs interesantus pasuokumus, akcejis, radeis jaunys izruodis ci gruomotys, veicynuos muokslys i tradiceju saglobuošonu i atteisteibu. Tys zeimej, ka latgalīšu volūdu turpmuok dzierdēsit i redzēsit bīžuok – na tikai intervejuos, bet ari žurnalistu aizkadra tekstūs.

Kūpumā konkursam beja īsnāgts 131 projekts, nu jūs atbaļsteiti gondreiž 70 projekti ar kūpejū finansiejumu 124 500 eiro.

LRT veiduotūs sižetus latgalīšu volūdā redzēsit ziņu raidejumūs, kū kasdīnā puorraida kanali Re:TV i Rīga TV24, kai ari piec puorraidis jūs varēs atrast LRT škārsteikla sātys lopā www.lrtv.lv i uzjāmuma lopuos socialajūs teiklūs “Facebook” i “Youtube”.

Print Friendly, PDF & Email