Rokstu sagataveja: portals lakuga.lv

1. junī 20.30 stuņdēs Bolvūs ar guojīni nu Bolvu nūvoda pošvaļdeibys iz estradi suoksīs vierīneigs muzykys pasuokums “Mirklis Balvos”, 21.00 stuņdēs koncertā pīsadaleis 46 kori nu vysys Latvejis, 16 pyutieju orkestri nu Latgolys, pavadūšuo grupa Andra Sējāna vadeibā, Brīžucīma etnografiskais ansamblis i jaunīšu folklorys kūpa “Soldanī”, Bolvu Kulturys i atpyutys centra videjuos paaudzis deju kūpa “Nebēda”, kūpā puļcejūt vaira kai 2000 daleibnīku, informej svātku koordinatore Iveta Tiltiņa.

Dzīšmu i deju svātki ir unikals latvīšu tautys folklorys montuojumā i profesionaluos muzykys tradicejuos i jaunradē sakņuots Latvejis kulturys nūtykums, kurs viesturis gaitā ir dabuojs nacejis vīnuoteibys i nacionaluos identitatis simbola nūzeimi. Svātki ir regulars i ciklisks process, kuru kulminaceja ir Vyspuorejī Dzīšmu i deju svātki reizi pīcūs godūs. Kab veicynuotu Dzīšmu i deju svātku tradicejis ilgtspieju Latvejis pošvaļdeibuos, saglobuotu lobu skaniejumu, nūtureigu daleibnīku sastuovu, styprynuotu koru kūpdzīduošonys tradicejis, teik reikuots itys pasuokums.

Koncertā izskanēs 16 koru dzīsmis, suocūt ar “Dziesmai šodien liela diena” i “Dvēseles dziesmu” nūslāgumā. Kab paruodeitu latgaliskū identitati, pieškiltu dzierksteiti pasuokumam, Ilmārs Dreļs speciali itam pasuokumam ir izveiduojs dejis “Tolka” horeografeju (Ilonys Rupainis i Eināra Lipska muzyka i aranžeja), kuru izdejuos “Nebēda”. Koncerta muokslinīcyskais vadeituojs Uldis Kokars, režisore Edīte Siļķēna, pyutieju orkestru viersvadeituojs Egons Salmanis, muokslinīks-nūformātuojs Bolvu Muokslys školys direktore Elita Teilāne. Pasuokumu vadeis Oskars Lustiks i Agnese Laicāne. Piec koncerta – balle kūpā ar grupu “Sestā jūdze”. Īeja pasuokumā bez moksys.

Pasuokumu organizej Bolvu nūvoda pošvaļdeiba sadarbeibā ar Latvejis Nacionalū kulturys centru. Pasuokumu atbolsta Vaļsts kulturkapitala fonds.