Festivalā “Līgo Višķos” latgaliskys tradicejis i “Latgalīšu reps”

Festivalā “Līgo Višķos” latgaliskys tradicejis i “Latgalīšu reps”

Rokstu sagataveja: portals lakuga.lv

Jau sastū godu Vyšku estradē, gleznainā Luknys azara krostā, Daugovpiļs nūvoda pošvaļdeibys agentura “Taka” reikoj festivalu “Līgo Višķos”. Festivalā nūteik i tradicionali Vosorys saulgrīžu rituali folklorys kūpu pavadeibā, i baļle i diskotekys, i sporta pasuokumi, i meistarklasis, i vēļ vysaidys aktivitatis, informej Liāna Cvetkova.

21. junī nu 21.00 stuņžu vysi gaideiti Latgaliskūs tradiceju i prasmu sātā “Ambeļu skreine”, kur nūtiks interaktivs pasuokums “Vosorys saulgrīži Ambeļūs”. Te varēs īsapazeit ar latgalīšu īleiguošonys tradicejom, nūtiks rūtalis i daņči kūpā ar folklorys kūpom “Speiga” i “Dyrbyni”, guņskura aizdegšona, meistarklasis vaiņuku peišonā i zaļumbaļle da poša reita kūpā ar duetu “Inga un Normunds”. Pastreipojūt latgalīšu vīsmīleibu, īeja itymūs pasuokumūs ir bez moksys.

22. junī 23.00–3.00 stuņdēs nakts pasuokums kūpā ar “Lauku studiju”, kas reikuos “Disko ielīgošanu” Vyšku estradē. Gostu ierteibom estradis i stadiona teritorejā vysa festivala laikā byus vareiba palikt ar sovu telti, speciali īreikuotā teļšu piļsieteņā (īprīškeja rezervaceja). Festivala “Līgo Višķos” apmaklātuojim “Open-air” diskoteka par simbolisku moksu – 1 eiro.

23. junī 10.00–16.00 stuņdēs sporta turnirs “Esi Pirmais”. Saceņseibys nūtiks vysaiduos disciplinuos – pludmalis futbolā, strītbolā, tautys bumbā i jautrajūs startūs.

Nu 19.00 stuņžu Vyšku estradis teritorejā suoksīs golvonuo svātku sviniešona. Nūtiks muojražuotuoju i amatnīku tierdzeņš, radūšuos darbneicys, izbraukuma ādynuošona, izbraucīni ar laivom. Pyrmī 1000 pasuokuma apmaklātuoji tiks pacīnuoti ar sīru i olu.

19.30 stuņdēs Vyšku estradē svātku koncertu īskandynuos jaunīšu kapela “Augusti”. Atraktivī latgalīšu jaunīši prīcēs ar tautysdzīsmem i popularom ziņgem.

20.00 stuņdēs Līgo svātku sajiutys īness Uogris Tautys teatra akteri, izspielejūt Rūdolfa Blaumaņa “Skroderdienas Silmačos”. Blaumaņa luga sovu pyrmizruodi pīdzeivuoja tuolajā 1902. gods 30. janvarī Reigys Latvīšu bīdreibys teatrī. Vaira kai 100 godus vāluok luga ir latvīšu teatra fenomens, kū sevkurūs Juoņūs latvīši lobu pruotu vārušīs i verās, smejās da osoru i dzīd leidza Blaumaņa sirsneigajom kuplejom. Uogris Tautys teatris leiguos kūpā ar sovim skateituojim, pīduovojūt sekuot leidza īmīļuotajom, tik zynomajom i tik jautrajom Silmaču saimis ļaužu izdareibom i attīceibom.

Nu 22.30 stuņžu festivala apmaklātuojus kuorteigi izkustynuos par sensaceju palykušuo grupa  “Latgalīšu Reps”. Muzyki ir puorlīcynuoti, ka repam latgalīšu volūdā pateišom ir nuokūtne – golvonais ir mīlesteiba pret dzimtini, volūdu i muzyku.  Koncerta laikā byus varams izadoncuot i izadzīduot taidu popularu hitu pavadejumā kai “Žarej gali”, “Reita panorama”, “Ceļš iz muojom”.

Ar tymsu īkurynuosim Juoņu guni, a Juoņu reitu varēs sagaideit nakts baļlē, kūpā ar Latvejis šlageraptaujis daleibnīkim Kristīni i Alvi.

Vysys dīnys garumā  byus vareiba apmeklēt pierti, izbaudūt latvīšu pierts ritualus ci vīnkuorši atsapyušūt draugu kompanejā. Festivala laikā ir vareiba nakšņuot tyvuokajuos gostu sātuos ci Vyšku dīnesta vīsneicā, kai ari īreikuotajā teļšu piļsieteņā (juorezervej). Teļšu piļsieteņā byus vareiba ībraukt jau nu 21. juņa i juoizbrauc da 24. juņa piecpušdīnis.

Beleti SIA “Biļešu Paradīze” kasēs vysā Latvejā i www.bilesuparadize.lv , Daugovpiļs nūvoda pošvaļdeibys agenturā “Taka”, Vyšku pogosta puorvaļdē, Daugovpiļs turisma informacejis centrā. Vairuok informacejis www.visitdaugavpils.lv, https://www.facebook.com/ligoviskos/, http://ligo-viskos.mozello.lv/.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]