19. septembrī pi klauseituoju nūnuok grupys “Dabasu Durovys” trešais studejis albums ar nūsaukumu “Bāka”.
Albumā īkļautys 11 dzīsmis. Naatjemama grupys sovpateiba ari itūreiz – dzīšmu teksti latgalīšu volūdā, tok albumā īkļautys dzīsmis ari latvīšu literarajā volūdā.
Albumu caurstrāvoj ideja par tū, ka kotram nu mums ir vajadzeigs orientiers, kam sekuot, lai dzeivuotu pīpiļdeitu dzeivi. Ka taids ir atrosts, atlīk tik vierzētīs iz tū, nesaverūt iz škierslim i šaubom.

Īroksti topuši grupys studejā Daugovpilī, kai ari Arņa Slobožaņina, Romāna Sladža i Jura Linuža sātys studejuos. Dzīsmis miksēja Armands Treilihs. Albuma masteringu veice Nick Daves (Franceja). Īrokstūs pīsadaleja grupa “Dabasu Durovys” (Arņs Slobožaņins, Egils Kulmanis, Romāns Sladzis, Aleksandrs Tamans, Kristaps Strods, Valdis Rundzāns), kai ari gosti: Laura Bicāne, Evija Smagare, Dārta Stašāne, Tatjana Larionova, Andris Jurāns i Armands Ozoliņš. Vuoceņa dizainu veiduoja Aivars Bulis.
Albums izdūts CD formatā, tū varēs īsaguoduot pasuokuma vītā.