Igauņu saimis koncerts “Atīdami Zīmyssvātki”
Pils iela 4
Rēzekne, LV-4601
Latvia
25. decembrī, pošā Zīmyssvātku laikā, nūtiks latgaliski sirsneiga sasatikšona ar Igauņu saimi nu Gaigalovys koncertā “Atīdami Zīmyssvātki”. Ar Igauņu saimi Latgolys viestnīceibys GORS apmaklātuoji sasatyka 2016. goda Leldīnē, kod kūpeigā dzīšmu prīcā Rēzeknē izadeve cīši sirsneigs, nu reizē ļusteigs i eistyn latgalisks koncerts. Itūgod saime i tuos draugi saryupiejuši taidu sasatikšonu cytā nūzeimeigā goda laikā – Zīmyssvātkūs. Svātku koncertā skanēs Zīmyssvātku dzīsmis, latvīšu i latgalīšu tautysdzīšmu apdaris, kai ari ziņgis.
Igauņu saimis kapelā dorbojās pīci muzykanti: mamys Rasmys puorziņā ir ceitara, akordeons, perkusejis i stabule, tāvs Gunārs ir akordeona, stabulis, kūklis i garmanis spēlis meistars, meita Laima spielej bungys, stabuli, flautu, perkusejis, Marta – vejūli, mandolinu, perkusejis, bet Liene mandolinu, vejūli i garmani. Igauni kūpā muzicej jau nu 1991. goda Storptautyskuo folklorys festivala “Baltica”, dūmūt cīši lelu īguļdejumu latgalīšu tautys muzykys populariziešonā i tradiceju uzturiešonā, kai ari ziņgu īraksteišonā i izpiļdeišonā. Praktiski vysi saimis lūcekli aktivai dorbojās muzykys jūmā i ari turpynoj pylnveiduot sovu muzykalū izgleiteibu. Saime ir muzicējuse Lītovā, Igaunejā, Pūlejā, Uzbekistanā, Italejā, Portugalē, Amerikā i cytur. Muzykanti ir daudzpuseigi i elasteigi, vīns nu izaicynuojumu saimei beja 2009. goda rudiņs, pīsadolūt LNT reikuotajā saimu dzīduošonys šovā “Dziedošās ģimenes”.
Koncertā “Atīdami Zīmyssvātki” kluotyn Igauņu saimei uzastuos ari saimis lūcekļu “blokusprojekti”. Vacuokuo meita Liene dorbojās grupā “Arcandela”, kū veidoj sešys dažaidu muzykys jūmu puorstuovūšys personeibys ar daudzveideigu profesionaluos muzykys bagažu – pianists Rihards Plešanovs, etnomuzikologis Liene Brence (vejūle) i Aiga Sprindža (vokals), džeza muzikis Tuoms Lipskis (kontrabass), folkmuzikis Rolands Zelčs (akordeons) i operdzīduotuojs Kārlis Saržants. Ansambļa muzykalais bukets ir akademiskuos, džeza i tradicionaluos muzykys rodūšuo sinteze. Taipat svātku reizē īprīcynuos ari Rasmys vadeitais Gaigalovys pamatškolys ansamblis, kurā dorbojās jaunī muziki – Alise Jaudzema, Evelīna Spīča, Lorete Lucjanova i Imants Spīčs.