Dirty Deal Teatro radūšuo komanda īstudiejuse izruodi “Raudives radio” par Latgolā dzymušū parapsihologu Konstantinu Raudivi i juo pietejumim par piecnuovis dzeivi.

Filozofs i parapsihologs Konstantins Raudive (1909 – 1974) ir vīns nu pasaulī zynomuokajim latvīšim. Pasauļa īviereibu jis īgiva ar sovu unikalū pīeju piecnuovis dzeivis pieteišonai, veicūt myrušūs bolsu īraksteišonu. Tū jis dareja izmontojūt radeju i mikrofonu. Itai nūdarbei jis pīvērse ari sovu sīvu – rakstneicu i dūmuotuoju Zentu Mauriņu. Uztvert juo pietejumus i īrokstus nūpītnai, voi dreižuok kai viesturisku kuriozu, ir kotra poša breiva izvēle i atbiļdeiba.

Izruode “Raudives radio” izvaicuos švuorbys, kas apvej itūs īrokstus: voi parapsihologeja var kliut par zynuotni, voi bolsi nav tikai izdūmuojumi Raudivis golvā? Voi i kaidā veidā bolsi vyspuor var ar myusim sasazynuot? I cik lelā mārā Raudivis dorbs ir svareigs pasauļam? Izruodē skanēs poša Raudivis pīraksteitī myrušūs bolsi.