Kadriļu nakts

LaKuGa 2. Marts, 2017. gods 0
When:
20/05/2017 @ 19:00 – 23:00
2017-05-20T19:00:00+03:00
2017-05-20T23:00:00+03:00
Where:
Lūznovys muiža
Pils iela 8
Lūznava, Lūznavas pagasts, LV-4627
Latvia
20. majā 19.00 Lūznovys muižā doncuotgrybātuoji sasatiks nu jau trešajā Kadriļu naktī, ļaunūt atsagrīzt 20. gs. suoku savīseigajā dzeivē i itamā reizē izdoncojūt na tik latvīšu, nu ari cytu tautu kadriļys.

Itūreiz kadriļys īruodeis i doncuot aicynuos Latvejis Universitatis deju folklorys kūpa “Dandari” (Reiga), deju kūpa “Dziga” (Rēzekne), folklorys draugu kūpa “Vīteri” (Rēzekne) i folklorys kūpa “Svātra” (Daugovpiļs), nu storptautysku nūskaņu ūtro reizi pīškiers ari uorvaļstu gosti – itūreiz Tallinys folklorys ansamblis “Leigarid” (Igauneja). Taipat kai īprīkšejuos reizis, ari majā Kadriļu balu vadeis “bala maršals”, kurs dasaceis dejis i izskaidruos kotrys dejis izvesšonys kuorteibu. Bala dalinīki, apsavalkūt Kadriļu naktei, aicynuoti īvāruot 20. gs. suoku mūdis teņdeņcis.

20. majs itūgod ir ari Storptautyskuo Muzeju nakts, kurymā pyrma Kadriļu nakts nūtikšonys Lūznovys MŪZA aicynoj iz attaiseitūs durovu dīnu i muižys apsavieršonu.

Kadriļa ir deja, kurymā pīsadola puora skaits doncuotuoju puoru, kas nūsastuoj cyts cytam preteimā. Parosti tei ir četrpuoru deja, kurymā doncuotuoji izakuortoj četrstyurī. Nu 17. godu symta beigu da 19. godu symta beigu tei beja vīna nu pošom popularuokajom bala dejom. Tuos pyrmsuokumi rūnami angļu “lauku deju” tipa dejuos. Vāluok tū kuorteigi puorveiduoja i pylnveiduoja Fraņcejis deju školuotuoji. Tei palyka vys īcīneituoka, puorguoja ari iz Vuoceju i nūsastyprynuoja, vāluok jau palyka izplateita daudzuos Eiropys tautuos. Latvejā kadriļys daskaitamys pi senejuokajom latvīšu tautys grupu dejom, kas pīraksteitys 19. godu symtā. Leluo itūs deju izplateiba, eipaši Latgolā, nūruoda, ka ituos dejis bejušys cīši īcīneitys tautā. Suokumā kadriļys beja inteligeņcis dejis, tok jau 19. i 20. godu symta mejā tuos doncuotys vysur – gūdūs, balūs, krūgūs i daņču vokorūs.

Bala nūrise saturiski turpynuos aizsuoktū kadriļu doncuošonys vuiceišonuos i populariziešonys procesu, veidojūt deju pasuokumu Lūznovys muižā atbylstūši 20. gs. suoku savīseigūs pasuokumu stilistikai. Doncuot kadriļys aicynuots sevkurs interesents. Īīšonys kartis nūpierkamys vysuos “Biļešu Paradīze” kasēs, īīšonys moksa 4 eiro, vītu skaits īrūbežuots.