Īsamirdzēt leidza zvaigznem var, ka tu esi zvaigzne voi tovi dorbi runoj poši par sevi, izstorojūt gaismu, kū navar dzēst ni laiks, ni tymsa, ni suopis, ni ceļš, ni naatbyldami vaicuojumi. 14. oktobrī palyka 10 godu nu talanteiguos dzīduotuojis Aijis Rimšys aizīšonys myužeibā, tok jei vys vēļ spūdrai speid pi Latvejis muzykys dabasu, juos bolss uzrunoj daudzus klauseituojus, juos radeituo muzyka i vuordi līk i pasaceļt spuornūs, i aizadūmuot, i dūtīs leidza sapynam, i patīsi i dzili skumt, suopēt i vaicuot.

Kinys veiduotuoji ir Latgolys entuziastu grupa “Biļdis” (ideja, scenarejs – Ineta Atpile-Jugane, video, montaža – Sergejs Čakāns, video – Artis Vītols, dorba grupa – Edgars Blinovs, Pīters Laizāns, Vitālejs Dudarenoks).

Kina radeita nu 2014. goda pavasara da 2015. goda rudiņa. Tuos veiduošonā sovu atbolstu davuse i Aijis saime, i Aijis dzeivē tyvi i nūzeimeigi cylvāki, muziki i Aijis kolegi, leidzgaitnīki. Kinys veiduotuoji pasasoka Aijis mamai Marijai Tāraudei, Aijis dālim Ilvaram i Intaram Rimšim, Pīteram Laizānam, Andram Dzērvem, Eināram Lipskim, Andram Šīrantam, Normundam Liepiņam, Daiņam Platačam, Teņam Bikovskim, Valentinai Lohovai, Siļvejai Kolesnikai, Inesei Grāvlejai par daleišonūs puordūmuos, pīdzeivuotajā, kūpā veidojūt atmiņu stuostu par naatkuortojamū i talanteigū dzīduotuoju, personeibu i vīnkuorši cylvāku – Aiju.

Kinā izmontuoti materiali nu Aijis saimis arhiva, Latvejis Televizejis arhiva, Latvejis Radejis arhiva, P. Laizāna, V. Lohovys, A. Dzērvis, A. Bondarenko personeiguo arhiva.