16. julī Lūznovys muiža aicynoj nu jau iz ūtrū Muokslys pikniku – muokslu i garšu festivalu, kurymā vīnuvīt aicynuoti puļcētīs muokslys baudeituoji, sajiutu gordieži i eipašūs šaļteņu kolekcionari, kab ar muzykys, muokslys, dejis, garšu i cytom baudom pīdzeivuotu muokslys radeišonys šaļti.

Muokslys piknika laikā nu 13.00 da pošys pušnakts Lūznovys muižā i tuos parkā byus pīdzeivuojamys, apsaveramys, klausamys i garšojamys baudys. Par skaneiguom baudom pasaryupēs “Audience Killers”, “Framest”, “Tautumeitas”, Rihards Lībietis, “Piparmētra”, “Rūnas”, “Voice Of Instruments”, Reinis Young – Jaunais, “L’Chaim”, “Jezups i Muosys”, džeza duets nu Igaunejis – Villu Veski i Tiit Kalluste, kai ari cyti muziki. Muzykalūs garšu programa meisīs ar cytom baudom – byus apsaveramys treis laikmeteiguos dejis izruodis, vareiba dzeivuot leidza literari muzykalajam izvadumam “Atlaižu”, apsaverama muokslys plenera nūrise, ļaušonuos kinu kairynuojumam i burbuļu šovam, kai ari vareiba pīdzeivuot cytu mūzu byušonu kluotyn.

Kai jau piknikam pīdar, natryuks ari gastronomisku prīcu i puorsteigumu – Mūzys vakarenis, garšu eksperimenti i puorbaudeitys vierteibys. Taipat kotrys nu pasuokuma gostu aicynuots iz pikniku leidzi jimt sovu pīpiļdeitū piknika skalini, kū varēs baudeit tam eipaši paradzātuos vītuos.

Pīdzeivuot Muokslys pikniku aicynuoti ari mozuokī muokslys baudeituoji, kurim paradzāta eipaša pasuokumu programa ar vareibu aktivai dorbuotīs rodūšajuos meistardarbneicuos – veit vaiņukus, radeit sovus muokslys dorbus grafikys darbneicā, baudeit gordiežu meistarklasis taišni bārnim i ļautīs cytom aktivitatem.

Muokslys piknika ideja ir savīnuot vysaidys jūmys i disciplinys, paruodūt, ka nav juobyut profesionalam muokslinīkam, kab varātu sev apleik atkluot i nūviertēt skaistū, partū iz pasuokumu aicynuots sevkurs, kas lobā kompanejā gryb sajimt muzykalu, vizualu i gastronomisku baudejumu. Dūma par Muokslys pikniku Lūznovys “Mūzā” rodusēs, savīnojūt te asūšū Mūzu, īdviesmi i atjaunuotuos muižys muokslys izpausmem pīmāruotū infrastrukturu. Pārņ nūtykušais Muokslys pikniks sajēme lelu atsauceibu, puļcejūt i vītejūs dzeivuotuojus, i gostus nu cytu Latvejis vītu. Pasuokums ari itūgod kuplynuos Rēzeknis nūvoda dīnu programu.

Īīšonys moksa Muokslys piknikā ir 3 eiro, bārnim da 12 godu vacuma – bez moksys. Beleti īprīkšpuordūšonā nūpierkami “Biļešu Paradīze” kasēs i škārsteiklā, kai ari iz vītys pasuokuma nūtikšonys dīnā.