2009. gods ir nūzeimeigs Latgolys kulturviesturē ar vairuokom lelom jubilejom. Itūgod palīk 105 godi nu drukys aizlīguma atceļšonys Latgolā, „Tāvu Zemis Kalendaram” – 70 godi, vairuokys izcylys personeibys svieteitu opolys jubilejis: Marija Andžāne i Konstantins Raudive – 100, Fraņcs Trasuns – 145.
Kab sekmeitu jaunīšu interesi par Latgolys kulturviesturi i niulenejū dzeivi, bīdreiba „Latgolys Studentu centrs” izsludynoj jaunīšu rodūšūs dorbu konkursu par Latgolu.
Konkursam ir divejis dalis: eseju konkurss i vizualūs dorbu konkurss.

Rodūšūs dorbu konkursa aizdavums – veicynuot Latgolys jaunīšūs interesi par sova nūvoda kulturu, viesturi, nūzeimeigom personeibom, volūdu i sabīdriski politiskim procesim.
Eseju konkursa aizdavums – rūsynuot jaunīšus izsaceit sovys puordūmys latgalīšu rokstu volūdā, tai sekmejūt rokstu volūdys tradicejis nūsastyprynuošonu Latgolā.
Vizualūs dorbu, par pīmāru, plakatu i karikaturu, konkursa aizdavums – paust sovu vīdūkli par myusdīnu i viesturiskajim procesim, izmontojūt vizualuos muokslys tehnikys.

Konkursā var pīsadaleit jaunīši: pamatškoļnīki (7.-9.klase), vydsškoļnīki, studenti vacumā da 25 godu.

Dorbus var īsnīgt latvīšu i latgalīšu rokstu volūduos (dorbim, kuri raksteiti latgalīšu rokstu volūdā, byus papyldu punkti i klaidys natiks jimtys vārā).

Konkursam īsnīgtūs dorbus vērtēs bīdreibys „Latgolys Studentu centrs” vaļde i juos pīaicynuotuos personys.

Rodūšūs dorbus syuteit bīdreibys „Latgolys Studentu centrs” Reigys birojam, Antonijas ielā 8-3/6, Rīga, LV - 1010 ar nūruodi „Rodūšūs dorbu konkursam” da 2009. gods 10. apreļa (posta zeimūgs, syutūt pa postu) voi iz e-postu: lgsc@inbox.lv.
Lyudzam nūruodeit: vuordu, uzvuordu, vacumu, vuiceibu īstuodi, e-postu i kontakteleponu.

Vaira informacejis i rodūšūs dorbu konkursa nūlykums - pīlykumā.