Rokstu sagataveja: portals lakuga.lv

Muzike Santa Savicka-Drozdova prezentej dzīsmi “Rāznys azars”, tei stuosta par jai tik tyvū Latgolys azaru. Pavysam naseņ Santa kūpā ar gitaristu Viktoru Zaharovu izveiduojuse grupu “Visi Savi”.

Santa Savicka-Drozdova atkluoj, ka Rāznys azars jai vysod bejs eipašs i pi tuo jei pavadejuse daudz laika gon bierneibā, gon školys godūs, gon ari niu pi kotrys vareibys aizadūd pi azara. Tī pavadeitais laiks īdvasmuojs radeit dzīsmi “Rāznys azars”.

“Bierneibā vēļ nasaprotu, cik eipašs maņ byus Rāznys azars, bet niu, kod godi ir paguojuši, ir vēļ stypruoka saikne ar azaru. Kotru reizi, kod braucu iz Kaunatu, es obligati nūbraucu da azara naatkareigi nu godalaika. Jis dzierd, jis saprūt, jis jiut mani i es jiutu jū. Pi ituo azara ir saraksteita na vīna viņ dzīsme. Azars pīvalk kai magnets. Maņ kai dobys cylvākam gribīs vēļ i vēļ atsarast pi juo,” atkluoj muzike.

2019. godā Santa Savicka-Drozdova uzastuojuse vairuokūs pasuokumūs, tymā skaitā “Upītes Uobeļduorzā”, kur ari skanēja dzīsme “Rāznys azars”. Pavysam naseņ Santa kūpā ar gitaristu Viktoru Zaharovu nu Rēzeknis izveiduojuse grupu “Visi Savi”, jūs reperturā puorsvorā ir autordzīsmis. Dzīsmi “Rāznys azars” jei beja īsnāguse konkursam “Supernova 2020”, tok sajāmuse atsacejumu. Sovukuort 2020. godā Santa cer uzastuot festivalā “Muzykys skrytuļs”. Kai atzeist poša muzike, asūt pīraksteits jau daudz dzīšmu i ari daudz planu, tok vysam sovs laiks.