Rokstu sagataveja: portals lakuga.lv

Pavasars atguojs ar daudzom kulturys nūtikšonom, vīna nu atzeimejamūs vysā ir ari Rēzeknis Muokslys noma atdzimšona gondreiž piec diveju godu puortraukuma. Ka ir gribiešona saprast, kaida ir bejuse Rēzeknis i Latgolys muoksla cauri laikim, Muokslys noms ir vīta, kur tū var izdareit. Tei ir eistyna muokslys pērle ar cīši pateikamu atmosferu.

Rēzeknē, 18. novembra īlā 26, atsarūn eipaša sāta – Muokslys noms. Kūkgrīzumim boguoteigi rūtuotuo āka calta eklektikys stilā 19. godu symta pādejā caturksnī kai tierguotuoju Vorobjovu vosorys rezideņce, tok piečuok nūdūta piļsātys eipašumā. Suokumā āka atsaroda piļsātys nūmalē, partū ka Rēzeknis centrs reiz beja Latgolys īlys daļa i tiergs. Tūlaik īlu, iz kurys cēle rezideņci, sauce par Uorpiļsātys īlu.

Muokslys nomam bejušys vysaidys funkcejis – školuotuoju instituts, škola, tuberkulozis dispansers, ari kara komisariats. Mejūtīs saiminīkim i ākys pamatfunkcejom, gondreiž piļneibā tyka iznicynuots ākys interjers. 20. godu symta 90. godu suokumā āka beja tukša, cikom 1995. godā tū īsaguoduoja Muokslys koledža (niu Rēzeknis Muokslys i dizaina vydsškola). Pasasokūt pedagogu i školānu īguļdeitajam dorbam, ākai atjaunuoja tuos suokūtnejū izskotu. Sovpus par ākys viesturiskajim aizsuokumim ir cīši moz ziņu, partū ka nav izadevs sasazynuot i izvaicuot ākys mantinīkus, nu kurūs tei tyka puorpierkta.

Rēzeknis Muokslys i dizaina vydsškolys izstuožu kuratore Ināra Jackovska izsoka nūceju, ka varbyut koč kod izadūs atrast kaidus arhivu materialus par ituos ākys aizsuokumim. Viesturiskuos informacejis tryukuma deļ lela daļa nu interjera ir veiduota, bolstūtīs iz tuo laika standartim. Sovpus greidys parketa kluojuma roksts i grīstu gleznuojumi vys ir atjaunuoti piec originalūs detaļu. Muokslys noma pogolmā ir ari izkluots senejais brugis nu sūplūk asūšuos Raiņa īlys, kuru nūjēme īlys remonta laikā.

Piec pādejūs dorbu ākai ir nūmaineits jumts, īšktelpuos – špaleri i atsvaidzynuota gleznu ekspoziceja. Niu Muokslys nomā var apsavērt Latgolys muokslys atjaunuotuos ekspozicejis pyrmū daļu. Ekspoziceju veidoj Rēzeknis muokslinīku kūpys dalinīku dorbi (20. gs. 30. godi), kai ari sabīdreibā zynomu Latgolys gleznuotuoju dorbi nu Latgolys Kulturviesturis muzeja kruojuma.

Muokslys nomā atsarūn vairuokys telpys, daļa nu tūs veļteitys konkretu muokslinīku dorbim (Osvalds Zvejselnieks, Francisks Varslavāns, Arvīds Egle, Vitālijs Kalvāns), vīnā nu telpu apsaverami dažaidu Latgolys muokslinīku dorbi.

Ekspozicejis ūtruo daļa ar myusu dīnu muokslinīku dorbim tiks attaiseita junī leidz ar aktivuo turisma sezonu.

Iz prīšku Muokslys nomā planavuots atjaunuot ustobys viersu i pogrobu.

Apmaklātuoji ekskursejis lyugti dasaceit pyrma apmekliejuma pa teleponu: 29637905. Muokslys noma dorbalaiks: ūtardīnem i pīktdīnem – 10.00–18.00; sastdiņ – 10.00–16.00.

Galerejā Rēzeknis Muokslys noms. Foto Edeite Husare/portals lakuga.lv

no images were found