Izstuodē “Pilsētas Daugavas krastos” pīsadola 18 gleznuotuoju: Dzintars Adienis (Jiurmola), Laima Akmentiņa (Reiga), Ziedonis Bārbals (Jākubpiļs), Kaspars Bērziņš (Reiga), Gunta Brakovska (Reiga), Nadežda Demidova (Reiga), Juris Ģērmanis (Reiga), Oskars Jansons (Daugovpiļs), Laine Kainaize (Reiga), Rolands Krišjānis (Reiga), Vita Merca (Reiga), Valda Mežbārde (Daugovpiļs), Ieva Muzikante (Reiga), Emīls Kristiāns Muzikants (Reiga), Aleksejs Naumovs (Reiga), Velta Riekstiņa (Ūgre), Juoņs Streičs (Reiga), Ilgvars Zalāns (Reiga) i seši tieļnīki: Ģirts Burvis (Reiga), Līga Čible (Daugovpiļs), Vija Ilze Dzintare (Reiga), Ivo Folkmanis (Daugovpiļs), Tālivaldis Muzikants (Reiga), Jānis Strupulis (Reiga).

Muokslinīkus apvīnoj kūpeiga tema – Latvejis liktiņupe Daugova i piļsātys tuos krostūs. Tei jūs dorbūs roduse daudzveideigu atspīgeļuojumu, suocūt nu reali zynomu vītu da filozofiskys nūsaceiteibys. Izstuodis gleznuos attāluota Kruoslova, Daugovpiļs, Siline, Jākubpiļs, Ūgre, tok vysvaira autori pīsavārsuši Reigai.

Izstuodē “Pilsētas Daugavas krastos” īkļautys puorsvorā naseņ radeituos ainovys, gleznīciskuos kompozicejis, medalis i skulpturys ar Daugovys regiona piļsātu arhitekturys tektoniskū daudzveideibu, linearajim ritmim i kruosaineibu. Muokslinīki ar sovu daiļradis plašumu gryb veiduot dialogu ar skateituoju. Itaida muokslys interešu mejīdarbeiba rodūši boguotynuos izstuodis skateituojus i muokslinīkus. Muokslinīki kotrys sovā veidā filozofiski rysynuojuši cylvāka eseibu laikā – paguotnē i niu, tautys i individa vītu pasaulī. Dorbi īmīsoj tīksmi iz gaismu.

Reigys Latvīšu bīdreibys, Daugovpiļs Latvīšu bīdreibys i Daugovpiļs Nūvodpietnīceibys i muokslys muzeja kūpeiguo izstuode “Pilsētas Daugavas krastos” byus apsaverama da 26. juņa.