Izstuode “Trīs no “Osīšiem””
Izstuodis autoris ir vīnys saimis treis puorstuovis: Una, Kristīne i Silvija – div muosys i muote. Una Gura ir dzymuse Daugovpilī, piečuok absolvēja Rēzeknis Lītiškuos muokslys vydsškolys Keramikys nūdaļu, kam sekuoja studejis Latvejis Muokslys akademejis Latgolys filialē. Daugovpiļs Universitatē tyka dabuots magistra grads muokslā i pedagogejā, tūlaik dzeivis gaitys muokslineicu ari savede ar gleznīceibu. Nu 1998. gods muokslineica pīsadola plenerūs, izstuodēs i cytūs ar muokslu saisteitūs pasuokumūs Latvejā i uorvaļstīs. Personeigī rodūšī mekliejumi teik veiksmeigai apvīnuoti ar pedagogiskū dorbu: kasdīnā Una Gura ir vizualuos muokslys i keramikys školuotuoja.
Unys muosa Kristīne Lipkova ir absolvējuse Daugovpiļs Dizaina i muokslys vydsškolu “Saules skola”, piečuok ari Latvejis Muokslys akademejis Latgolys filiali. Iz kaidu laiku dzeivis gaitys jaunū muokslineicu aizvede iz Londonu. Itūšaļt Leivuona stykla i amatnīceibys centrā Kristīne dorbojās rodūšuo mierka sasnīgšonā – realizejās kai muokslinīks. Golvonuo muokslineicys nūdarbe ir gleznīceiba EBRU tehnikā iz tekstila.
Unys i Kristīnis muote Silvija Gura jau nu bierneibys labi zeimēja. Meitinei beja sapyns byut par slovonu muokslineicu, tok dzeive ruodeja, ka ar muokslu navar nūpeļneit iztyku saimei. Kod obejis meitys izauga i palyka par muokslineicom, ari muote pīsavērse tam, piec kuo ilgojās sirds – gleznīceibai.