Latgaliskais seminars “Atzolys”

Kod:
11/08/2022 @ 14:00 – 14/08/2022 @ 18:00
2022-08-11T14:00:00+03:00
2022-08-14T18:00:00+03:00
Kur:
Rekovys vydsškola

2022. gods augustā bīdreiba “LgSC” Bolvu nūvodā reikuos bezmoksys četru dīnu latgaliskū seminaru jaunīšim “Atzolys”, kurā varēs pīsadaleit 20 jaunīšu vacumā nu 16 da 25 godu, kab vuiceitūs latgalīšu rokstu volūdu, īpasazeitu ar myusdīnu Latgolys personeibom, kai ari izzynuotu regiona kulturviesturi i ituos šaļts īspiejis jaunīšimviesteits bīdreibys sagatavuotajā informacejā.

Jaunīšu seminars “Atzolys” paradzāts nu 2022. gods 11. da 14. augusta Bolvu nūvoda Rekovys vydsškolā. Seminarā pīsadaleit varēs jaunīši nu 16 da 25 godu ar interesi vuiceitīs latgalīšu rokstu volūdu, runuot latgaliski, īpazeit latgaliskū kulturu i vierteibys, kab styprynuotu sovu identitati, iz prīšku veiduotu stypru Latgolys regionu i īsasaisteitu piļsūniskuos sabīdreibys veiduošonā, kai ari socializātūs, veiduotu jaunus kontaktus, interesanti pavadeitu laiku ar dūmubīdrim i īsadvasmuotu nu Latgolā aktivūs ļauds.

Pyrmū reizi seminars “Atzolys” nūtyka 2004. godā i tai sešus godus piec kuortys da 2009. goda, piečuok ar puortraukumim 2014. i 2016. godā. Kab aktivi īsasaisteitu latgalīšu kulturys procesūs, seminars sovulaik bejs kai atspierīņa punkts ari daudzim itūšaļt latgaliskajā kulturtelpā zynomajim aktivistim. Seminara “Atzolys” mierkis ir veicynuot jaunīši aktivu īsasaisteišonu demokratejis i piļsūnyskuos sabīdreibys veiduošonā, jūs izgleitojūt vaicuojumūs, kurī saisteiti ar socialekonomiskajim faktorim i Latgolys regiona vierteibom, jo eipaši latgalīšu rokstu volūdu.

Seminara dīnuos jaunīšim paradzātys kai latgalīšu rokstu volūdys i Latgolys kulturys nūdarbeibys, tai ari sasatikšonys ar itūšaļt Latgolā aktivim muokslinīkim i īdvasmuotuojim. Jaunīšim byus vareiba ari izzynuot vaira par breivpruoteigū dorbu, latgalīšu NVO, socialū uzjiemiejdarbeibu i byušonu aktivim regionā. Taipat “Atzolu” laikā jaunīši varēs praktiski īpasazeit ar vīnu nu latgaliskuokūs vītu Latvejā – Upītis kulturtelpu i tuos dažaidū pīduovuojumu.

Ar jaunīšim seminarā struoduos: latgalīšu rokstu volūdys nūdarbeibys pasnēgs latgalīšu rokstu volūdys specialiste Māra Mortuzāne-Muravska, par breivpruoteiguo dorba i socialuos uzjiemiejdarbeibys īspiejom stuosteis Regita Zeiļa, ar Zīmeļlatgolys kulturu i ituo goda jubilaru, īvārojamū Latgolys kulturys personeibu Mikeli Bukšu īpazeistynuos Bolvu Centraluos bibliotekys vadeituoja Ruta Cibule, komandys sasalīdiešonys aktivitatis vadeis Ieva Johansson nu platformys “MeYou.One”, īdvasmojūšys nūdarbeibys vadeis i par jaunīšim aktualū myusdīnuos runuos Lauris Zalāns, hiphopa meistarklasi reikuos i kūpā ar jaunīšim “Bigmaar’s Records” studejā rodūši struoduos repere Ūga aba Daiga Barkāne, taipat seminarā gasteis ari cyti lektori, aktivisti i latgalīšu kulturys personeibys.

Seminara nūtikšonu finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu, kai ari Latgolys kulturys programa, kurū eistynoj Vaļsts kulturkapitala fonds i Latgolys regiona atteisteibys agentura ar AS “Latvijas valsts meži” atbolstu. Seminara reikuotuojs – bīdreiba “LgSC”.

Print Friendly, PDF & Email