Latgolys omotu svātki
When:
08/08/2024 @ 10:00 – 10/08/2024 @ 16:00
2024-08-08T10:00:00+03:00
2024-08-10T16:00:00+03:00
Where:
Raiņa muzejs "Jasmuiža"
Raiņa muzejs “Jasmuiža”, svietejūt muzeja 60. jubileju, nu 8. da 10. augusta aicynoj iz Latgolys tradicionaluos kulturys i omotu muoku saglobuošonys i populariziešonys pasuokumim. Treis dīnu garumā muzejā nūtiks kai fiļciešonys darbneica i keramikys trauku lobuošonys meistarklase, tai ari apmaklātuoju īmeiļuotī cepļa kūršonys svātki i da ituo vēļ nabejuši keramikys vyrpuošonys paraugdemonstriejumi, kur sovus pyrmūs muola traukus taiseis Latgolā zynomys personeibys, tai raugūt saprast, cik gryuts i sarežgeits ir keramika dorbs.
8. augustā 10.00 stuņdēs nūtiks apovu fiļciešonys darbneica aba vylnys veļšonys darbneica, kurā meistaris Ilonys Abdulajevys vadeibā byus vareiba īsavuiceit fiļciešonys omota pamatprasmis i sataiseit sovu unikalū apovu puori. Daleiba bez moksys, lyugums dasasaceit da 6. augusta pa tel. 29326833 (Anita).
9. augustā 14.00 stuņdēs apmaklātuoji varēs pīsadaleit keramikys trauku lobuošonys meistarklasē. Tū vadeis keramiki Olga i Valdis Paulini, kuri demonstrēs vysaidus maituotu keramikys trauku lobuošonys pajiemīņus, kab muola trauki natyktu atkrytumūs, bet varātu dzeivuot “ūtru dzeivi”. Meistardarbneicys dalinīkim byus vareiba salobuot sovu leidza pajimtū muola trauku. Daleiba darbneicā bez moksys.
Taipat 9. augustā 19.00 stuņdēs muzejā nūtiks īdvasmojūša keramikys vyrpuošonys meistarklase. “Kab paruodeitu, ka keramika omots nav nimoz tik vīglys i vīnkuoršs, kai izaver, i sevkurs cylvāks tai vīnkuorši navar izvyrpuot muola trauku, vystik prasmeiga meistara vadeibā, īguldūt laiku, trenejūt pacīteibu i radzūt, ka tys izadūd sabīdreibā zynomam cylvākam bez pīredzis, īdvasmuosim i aicynuosim sevkuru paraudzeit vuiceitīs pūdnīka omota muoku,” stuosta pasuokuma organizatori.
Keramika Andra Ušpeļa sabīdreibā zynomi latgalīši – dzīduotuojs Dainis Skutelis, dzejneica Dagneja, prāvests Aigars Bernāns – raudzeis sataiseit kaidu keramikys trauku. Interesenti tū varēs vērtīs kluotīnē, kai ari process tiks fiļmāts i video izvītuots Memorialūs muzeju apvīneibys YouTube kontā.
9. augustā, suocūt nu 11.00 stuņžu, nūtiks ari kasgadejais keramikys cepļa kūršonys pasuokums Latgolys keramikys vacmeistara Andreja Paulāna darbneicā–ceplī. Cepli kūrs tautys lītiškuos muokslys studejis “Rēzeknes apriņķa pūdnīki” dalinīki i jūs draugi. Keramiki ar sovim apdadzynuošonai sagataveitajim muola traukim pīpiļdeis cepli i ap pušdīņlaiku tū īkūrs. Cikom ceplis kurēsīs, vokora gaitā byus vareiba pasarunuot ar pūdnīkim, vērtīs cepļa kūršonys procesu i vālā vokorā – lelū līsmi.
Sovutīs 10. augustā 11.00 stuņdēs nūtiks keramikys cepļa attaiseišona i svaigi apdadzynuotūs, vēļ korstūs, kruošni glazātūs trauku izjimšona. Byus vareiba dorbus ari nūpierkt.
Pyrma cepļa attaiseišonys nūtiks viktorina – vaicuojumi par muzeju, Latgolys keramiku, tuos tapšonys niansem, viesturi, formom, glazurom. Viktorinu vadeis pūdnīks i TLMS “Rēzeknes apriņķa podnieki” vadeituojs Andris Ušpelis.
8. i 9. augusta pasuokumūs i darbneicuos īīšona bez moksys.
10. augustā: īīšona 2 eiro. Cenā ītylpst muzeja apsavieršona.
10. augustā: īīšona 2 eiro. Cenā ītylpst muzeja apsavieršona.
