Beidzamūs godu nūtikšonys ir spylgtai īzeimiejušys sovstarpejū saisteibu, kas globalā mārūgā ītekmej vysus zemislūdis dzeivuotuojus. Tys ir izapauds ekonomikā, politikā, veseleibys apryupē, i izjāmums nav ari muokslys pasauļs. Taipat izjāmums nav ari Latgolys regions, kur muokslys dzeive ir turpynuojusēs i atsevišku cylvāku rodūšums ir izapauds jaunūs dorbūs.

Muokslys pasauļs eistyn nav izjāmums – ari tymā pastuov reakcionara darbeiba, sabīdreibai reflektejūt par myusu dīnu jaunajom normom, ik pa laikam teik akcentātys seņ īlaistys problemys, i nikur nav pagaisušys ari myužeiguos, naizsmeļamuos temys i īdvasmys olūti. Ari muokslinīki nav izjāmums – raugūt izpaust sovu individualitati, muokslinīks vys vēļ ir pasauļa daļa, kas dorbojās vīnuotā tālu i izteiksmis leidzekļu sistemā, kur kūpeiga volūda juoatrūn na tik ar skateituoju, bet ari pošam ar sevi.

Kaida ir bejuse muokslys i muokslinīka dzeive itymā sovaidajā laikā? Voi rodūšumam tei ir bejuse atelpys šaļts nu kasdīnys steigys, kab varātu pylnvierteigai nūsadūt procesam, voi, taišni ūtraiž, jaunuo kuorteiba ir radejuse gribiešonu vēļ osuok reagēt iz apleik nūteikūšū, atlīkūt molā skrupulozitati i rodūt impulsivus dorbus?

Itamā izstuodē apsaverami 44 Latgolys regiona muokslinīku dorbi, kas raksturoj beidzamūs godu sajiutys, fiksejūt kai puormainis, kas puorjāmušs kasdīnys dzeivi, tai namaineiguos vierteibys, kas godu gaitā vīnoj pasauli kūpeigā muokslys volūdā.

Izstuodē pīsadola:

Alīna Petkune, Agita Zemīte, Ludvigs Bērziņš, Aivars Bulis, Ilgvars Zalāns, Ilona Linarte Ruža, Dace Pudāne, Anastasija Dubovska, Žanna Vērdiņa, Svetlana Saveļjeva, Aiva Žūriņa, Inguna Liepa, Imants Haņeckis, Ingūna Levša, Ilze Griezāne, Ēriks Volonts, Anna Silabrama, Sanri, Nataļja Marinoha, Eleonora Pastare, Annele Slišāne, Viktorija Grappa, Vija Stupāne, Ksenia Shinkovskaya, Kristīne Nicmane, Diāna Apele, Darja Smirnova, Edgars Vronskis, Oksana Vronska, Vēsma Ušpele, Ilona Abdulajeva, Una Gura, Dāvis Ieviņš, Valija Platace, Sarmīte Bogdanoviča, Nellija Dzalba, Viktorija Valujeva, Agra Ritiņa, Ivo Folkmanis, Uldis Čamans, Mairita Folkmane, Aleksandra Šļahova, Lilija Zeiļa, Andris Bižāns.

Izstuode apsaverama nu 22. apreļa da 26. juņa.