Sv. Stefans ir 18. g. s. pyrmuos pusis polihroma kūka skulptura, kas kūpā ar vēļ četrom tyka izgluobta nu īprīškejuos Ludzys kūka bazneicys, kura nūdaga Ludzys lelajā guņsgrākā 1938. g. 11. junī. Vacuos Ludzys katuoļu kūka bazneicys kūkgrīzuma oltori ar skulpturom beja vīns nu izcyluokūs baroka laika muokslys pīminiekļu Latgolā.

2022. g. ir aizsuokta ituos skulpturys restauraceja: niu, nūslādzūt restauracejis 1. pūsmu, restaurators Aigars Pilenieks kūpā ar draudzis prāvestu Jākubu R. Doļu grib pastuosteit par padareitū, atkluotū i īcarātū.

Papyldus stuostam par Sv. Stefana skulpturu, varēs izzynuot da ituo nazynomus faktus par muokslys prīškmatim, izgluobtim nu nūdagušuos bazneicys. Kai eipašs muokslinīcysks prīšknasums atskanēs Sv. Stefana skulpturys stuosts, kas beja daļa nu pārņ sataiseituo teatra studejis “Azote” izvaduma “85 jeb 6 stāsti par svarīgāko, pieminot Ludzas lielā ugunsgrēku 85.gadskārtu” (Marikys Čerņavskys režeja, dzīdūšuos bundzineicys Vijis Mooris muzyka).

Pasuokums tiks translāts Facebook lopā Ludzas katoļu baznīca. Pasuokumā tiks vuokti zīduojumi Sv. Stefana tuoļuokajai restauracejai.