ar kotru cylvāku nūteik tikai tys, kam jis ļaun nūtikt. pa aiztaiseitom durovom navar īīt pat gaisma, kur vēļ ūtrys cylvāks. cytureiz durovys tai aizaugušys, ka nazyni, kai i dasist pi jūs – varbyut tī godim vaira nivinys dzeivys dvēselis.

a cytreiz goduos vēļ jūceiguok – tys cylvāks jau ir īguojs vydā, a vysleidza jis ir uorā. ar varu jau drēbis nūst namauksi i ceļa zuobokus nu kuoju narausi. īlaid taidu vydā, izlīc iz golda čaju, a jis pīsatryukst, pajem capuri i aizīt. kai apsaziņs i nazynuojs, pi kuo eisti atguojs. verās apleik, puorskaita nazkaidus avīzis izgrīzumus iz sīnys i aizbāg. tai stuovi ar sovu kiupūšū zuoleišu čaja krušku i breinojīs – deļkuo atguoja, kuo jam vajadzēja. reizem ak jau ļauds atsasoka nu dzeivis i izavielej bezgaleigu ceļu. i kur jam tai beja juoskrīn.

vysleidza ar myusim nūteikt tikai tys, kam ļaunam nūtikt. dūmuosi par iudini, īlyuzsi ladā. ar ticeibu var kolnus guozt, kur vēļ vīnkuorši dzeivuot. a reizem cylvāks natic pats sev i īlyuzt sevī kai pluonā pavasara izčauluojušā ladā. i kai taidu nu seve izgluobsi, ka pošai kryutīs lads.

kotram sovs kļūsters, sova manaka celle i sovs rūžu duorzs kūpams. kotram i sovs pogrobs, kurā sagryuzt tū, par kū narunoj, a kas nūsoka vysu dzeivi i valkās leidza kai nazkaids paguotnis susātivs i maisa dzeivuot – tai vīgli.

šūvokor viejā palyka solts gaideit tramvaju. viejs aurēja i nese snīgu riktiegā viejputnī, eists rogonu laiks! laiku kaveidama, guoju pa Vacreigu i čut naatlaužu kokla – zam svaigi sapyustuo snīga beja itei glumuo atkluotne. Marija ar bārnu i nazkaida frāze par cereibu, mīru i ticeibu.

īsadūmuoju – kotrai upei ir molys, a deļkuo nasaīt i nasaīt sasnīgt viņu krostu. mauņ i mauņ, a zemis pi apvuorkšņa kai nav tai nav. kai bejs iudiņs, tai palīk. i ceri kai duraks, ka mauņ pareizā vierzīnī, navys nazkur pa straumei iz jiuru i bezgaleigu i anonimu pasauļa okeanu, kam vyspuor molu nav – iudiņs sasavīnoj tys ar tū, leigojās vīnaldzeigūs viļņūs kai 3/4 planetys viersmys.

a dzeiveiba to jau cik miļjonim godu to izkuopuse iz zemis. i es poša asu augleiga zeme, tik nazkai tykuse upis vydā i pluovoju iz viņu krostu.