Itymā nedeļā Latgolys Kulturys centra izdevnīceiba izdavuse “Tāvu zemis kalenderi” 2012. godam i jau 16. literaturys almanahu “Olūts”. Obejis gruomotys ir izguojušys latgalīšu volūdā i tiks attaiseitys ituo goda 16. novembrī 14:00 stuņdēs Rēzeknis Centralajā bibliotekā.

Kulturviesturiskajai i literarajai godagruomotai “Tāvu zemis kalenders” itys ir 73. goda guojums, kalendera izīšonu atbolsta uzjiemiejs Juoņs Blaževičs, Rēzeknis piļsātys dūmis Kulturys puorvaļde i Latgolys regiona atteisteibys agentura. 16. “Olūta” izīšonu atbolsta uzjiemiejs Juoņs Blaževičs, Rēzeknis piļsātys dūmis Kulturys puorvaļde i Vaļsts Kulturkapitala fonds.

LKC izdevnīceiba dorbojās nu 1990. goda, itymā laikā izdūts vaira kai 400 vysaidu gruomotu, lela daļa nu tūs latgaliski. Vīns nu golvonūs izdevnīceibys mierķu ir “Olūta” i “Tāvu zemes kalendera” izdūšona.

Pyrms puors godu nūtykušā sarunā LKC izdevnīceibys vadeituojs Juoņs Eļksnis atzeimoj, ka leluokais kavieklis latgalīšu literaturys atteisteibai ir naleluo auditoreja, izgleituotu skaiteituoju tryukums i literaturys kritikys naasameiba – kab augtu tekstu literaruo kvalitate, par moz autoru publicēt, jis i juovuica, i juomudynoj raksteit vēļ i kvalitativuok.

Tūmār regularu literaru izdavumu pastuoveišona ir veids, kai ceļt literarū leimini i latgaliski rokstūšūs autoru pīsaisteit literarajam procesam, partū ka publiciešonuos īspieja veicynoj jaunu tekstu rasšonūs.

Sovu miseju izdevnīceiba redz autoru i skaiteituoju audzynuošonā i literaturys tapšonys veicynuošonā, juos izdūšonā, tai dūdūt īspieju latgalīšim i cytim intereseņtim skaiteit dzeju i prozu latgaliski. Deļtuo ka literatura ir poša vajadzeiguokuo muoksla – gleznys var apsavērt tikai muzejā, simfoneju nūsaklauseit koncertā, a gruomota ir kotrā sātā i pajemama rūkā sevkurā breivā šaļtī.

Izdevnīceibys sātyslopa atrūnama ite: http://www.lkcizdevnieciba.lv/, Reigā gruomotys meklejit bīdreibys “Latgolys Studentu centrs” birojā, kontakti – http://lgsc.lv/kontakti/reiga

Izdevnīceiba aicynoj gostūs iz “Olūta” i “Tāvu zemes kalendera” attaiseišonu 16. novembrī vysus kalendara i almanaha autorus i skaiteituojus!