Kam ilgi gaideita šaļts, kam varbyut byus pyrmuo dzierdiešona, bet izguojuse jauna gruomota latgaliski – latgalīšu autora Raibuo Suņa stuostu gruomota “Pyrma syltī”.

Raibuo Suņa debejis gruomotā ir īkļauti 12 stuosti, kas, poša autora vuordim sokūt, ir sagrupāti daudzmoz hronologiskā seceibā.

Daudzim varātu byut naskaidra gruomotys nūsaukuma “Pyrma syltī” ideja. Raibīs skaidroj: Tuos ir bierneibys atminis nu kuplajom rudiņa tolkom, kur beja izteikts kūpeibys faktors. Myusdīnuos syltu emoceju myusim nav voi gryuši atrast, voi juos speciali sliepam. A, dorbadīnā tei pušdiņu stuņdeite ir tys moments, kuo vysvaira gaidom, a piec pušdiņu jau ceņteigi gaidom dorbadīnys beigys.

Gruomotā varēs atrost gon jau dzierdietus stuostus, kas tykušs nūdāvāti ari par sova veida “klasiku” – “Raudzeits nav zaudeits” i “Dzeive ar munu babu” (stuosts, kas beja Raibuo Suņa pyrmuo publikaceja 2006. godā), kai ari jaunuokus stuostus. Skaiteituojs varēs pamaneit, kai atsateistejs, pasamainejs autora stils – nu ironiskuo, druponu īsaspraucūt erotiskajam, leidz sarkastiskajam.

Kai sūlej autors, gruomotā byus ari vysaidi cytaidi breinumi, bet vyss stuosts vīnolga grūzuos ap syltajim.

Gruomotys prezentaceja Rēzeknē “Klondaikā” nūtyks jau itymā sastdīnā 17.decembrī 20:00. Dzeivī skaitejumi ar puora muzykalom pauzem nu daGunchi i Jura Vucāna.

Gruomotu “Pyrma Syltī” izdūd bīdreiba „Kukuži” ar Vaļsts kulturkapitala fonda atbolstu.

„Pyrma syltī” byus nūpārkami bīdreibys “Latgolys Studentu centrs” birojūs i izbraukuma tierdznīceibuos. Par cytom vītom – sekojit leidza informacejai ci interesētīs iz e-postu: biedribakukuzi@gmail.com