5. janvara vokorā Reigā kinoteatrī “Splendid Palace” gasteja Baļtinovys dramatiskais kolektivs “Palādas” ar izruodi “Ontons i Zīmassvātki”.

“Palādu” gasteišonu Reigā kai seneju īceri 2013. goda suokuos realizieja bīdreiba “Latgolys Studentu centrs” i bīdreibai prīca, ka bileti tyka izpuordūti i baļtinovīšim beja vareiba uzastuot iz kinoteatra “Splendid Palace” skotivis, kas, kai atzyna poši akteri, beja da ituo kruošņuokuo skotive, iz kurys izruodeiti Ontona i Annis pīdzeivuojumi.

Izruode “Ontons i Zīmassvātki” ir izruožu cykla “Ontons i Anne” 6. daļa, kurys autore ir Danskovīte aba Anita Ločmele.
Itūreiz stuosts beja par Ontona Zīmyssvātkim. Annis vadakla gribieja sareikuot eistynus seņču Zīmyssvātkus, kab vysi unuki zynuotu, kai tūs pareizi svieteit. Ontons i Anne nagribeigi pīkryta, nu pošā svātku vokorā seņču tradicejuos īsalauza ari myusu dīnu realitate ar nūzīdznīku giusteišonu, stypruoku olu i čyguonim-zaglim, nu, nasaverūt iz tū, – vyss beidzās labi i svātki īsadeve!

LaKuGa sovim skaiteituojim pīduovoj nalelu īskotu vakardīnys pasuokumā gon foto karteņu, gon video fragmenta veidā.

Ziņu sagatavēja: LaKuGa