Latvejis Posts papyldynuojs sovu Latvejis piļsātu i nūvodu postmarku sereju ar trejom jaunom postmarkom, i divejis nu tuom veļteitys Latgolys apdzeivuotom vītom. Vīnā radzams Vuorkovys nūvoda gierbūņs, bet ūtrā – Varakļuonu piļsātys gierbūņs.

Varakļuonu piļsātys gierbūņs radzams iz postmarkys ar nominala vierteibu 0,35 Ls. Tei paradzāta vīnkuoršys viestulis syuteišonai Latvejis teritorejā. Piļsātys gierbūnī radzama lopsa i treis celi. Lopsa ir Varakļuonu mežu boguoteiba i cylvāku ospruoteibys simbols. Treis celi gierbūnī simbolizej treis svareigus lelceļus, kuri īīt Varakļuonūs nu Krustpiļs, Modūnys i Rēzeknis pusis. Postmarkys tiraža ir 100 000 eksemplaru.

Vuorkovys nūvoda gierbūņs radzams iz postmarkys ar nominala vierteibu 0,98 Ls, i tei paradzāta īraksteitys viestulis syuteišonai Latvejis teritorejā. Nūvoda gierbūņa apakšejā laukā radzams sudobra buļļs ar zalta rogim, kurs simbolizej pošaizlīdzeibu, augstsirdeibu i drūsmi, i mežrūzeitis zīds ar lopom dabiskuos kruosuos. Postmarkys tiraža ir 300 000 eksemplaru.

Reizē ar jaunajom postmarkom izdūta ari pyrmuos dīnys aplūksne i zeimūgs. Iz aplūksnis radzama Latvejis karte, kai ari Vuorkovys i Strenču nūvoda i Varakļuonu piļsātys gierbūni. Zeimūgā radzama Latvejis kontura i nūvodu i piļsātu atsarasšonys vīta kartē.

Sereju „Latvejis piļsātu i nūvodu gierbūni” Latvejis Posts izdūd nu 1991. goda, kotru godu papyldynojūt tū ar jaunom postmarkom.

Karteņa: izdūtuos postmarkys
Ziņu sagataveja: LaKuGa