Pyrmajā cykla „Cytaidi latviskais” raidejumā tuo autors i vadeituojs latgalīšu dzejnīks Valentins Lukaševičs skateituojim paleidzēs izprast latgalīšu literaturu, kū saleidzynoj ar cītūksni, kas laiku pa laikam viesturisku nūtykumu īspaidā zaudej pa kaidam ceglam sovūs myurūs, pīdzeivoj otkon lobuokus laikus, kod teik sakuortuots i atdzymst, kai pošlaik Daugavpiļs cītūksnis. Tys ir turistu apmaklāts, gluži kai latgalīšu literatura, kas spiej interesēt i aizraut ar sovu koloritu, latgaliskū runu i raksteibu.

Varēs īpazeit aizrauteigus profesionaļus, kurūs puorlīceiba sasavīnuojuse ar entuziasmu, kas kruoj, uztur latgalīšu litaraturys vierteibys, – privatuo muzeja eipašnīku Pēteri Loci i Latgolys kulturys centra izdevnīceibys vadeituoju Juoni Elksni. Par sovom sajiutom, apcerūt latgalīšu litaraturu kontekstā ar šudiņdīnys kulturys vierteibom, runuos dzejnīki Ivars Magazeiņs, Līga Seiksta-Deksne i multimuokslinīks Raibīs Suņs.

Sagataveja: LaKuGa piec LTV1 materialim