Bīdreiba “Latgolys Studentu centrs” itamā vosorā otkon aicynoj pīsadaleit jaunīšus vosorys naformalajuos apvuiceibuos “Atzolys”. Apvuiceibuos byus īspieja īsavuiceit raksteit latgaliski, uzzynuot viesturis i kulturys faktus, sasatikt ar Latgolys kulturys cylvākim, muzykantim, literatim. Tradicionali “Atzolys” paleidz apsazynuot jaunīšim Latgolys sovpateibu, īvuica byut lapnim par sovom saknem i pīdereibu i veicynoj jaunuos paaudzis iņteresi par Latgolu i latgaliskū. Golvonuo “Atzolu” vierteiba ir stypruos tradicejis, kurys teik saglobuotys jau godim i natiks pīmierstys ari itūgod. 

Naformaluos apvuiceibys nūtiks Rēzeknis nūvoda Bieržgaļa pogostā nu 10. da 13. juļam. Aicynuoti pīsadaleit jaunīši nu 17 da 22 godu vacumam. Dasacejuma anketu atrūņ ite i syuti iz lgsc@lgsc.lv.