17. septembrī 11.00 Raiņa muzejā “Juosmuiža” Dzejis dīnu ītvorūs nūtiks muzejpedagogiskuos programys “Latgalīšu kuozu tradicejis, kuozu i apdzīduošonys dzīsmis” prezentaceja, karaoke DVD diska “Latgalīšu kuozu i apdzīduošonys dzīsmis” attaiseišona. Pīsadaleis Preiļu Vaļsts gimnazejis folklorys kūpa “Rūtoj”.

Latgolai, latgalīšu volūdai, kulturai, folklorai i ļaudim jau nu bierneibys beja eipaša nūzeime latvīšu izciluo dzejnīka i dramaturga Raiņa dzeivē. Daudzus godus jis beja saisteits ar Latgolu, kur tāvs nūmuoja muižys i saimnīkuoja.

Pastyprynuota interese par tautys gora montom Rainim veiduojuos taišni studeju godūs. Folklorys materials vāluok boguoteigi teik izmontuots juo daiļradē. Studejūt Pīterburgys Universitatē, jaunais Rainis interesejās par latgalīšu folkloru. Jauneibā, uzaturūt Latgolā, tūpūšais dzejnīks vuocs i pīrakstejs kuozu dzīsmis i apdzīduošonys dzīsmis nu vītejūs teicieju, kai ari pīrakstejs apceriejumu par Višku pogosta kuozu īražom, kur apraksteiti rituali, tradicejis, izdareibys latgalīšu kuozuos 19. godu symtā.

Pasasokūt VKKF mierkprogramys “Latvejis Vaļsts mežu atbaļsteituo Latgolys kulturys programa 2014” i Kulturys ministrejis atbaļsteitajam projektam, Raiņa muzejs “Juosmuiža” ir sagatavejs jaunu interaktivu programu “Latgalīšu kuozu tradicejis, kuozu i apdzīduošonys dzīsmis”, kura no 17. septembra tiks pīduovuota muzeja apmaklātuojim. Projekta ītvorūs ir izveiduots DVD disks ar 3 latgalīšu kuozu dzīsmem (“Aizguoja sauleite”, “Jau mani vad”, “Aiz azara malni meži”) i 20 apdzīduošonys dzīsmem karaoke versejā. Fonogramys karaoke diskam īraksteja folklorys kūpa “Rūtoj” i tuos vadeituoja Ilze Rožinska, diska karaoke verseju izveiduoja Ivo Draudiņš.

Projekta ītvorūs izveiduotais karaoke disks byus breineiga vareiba paraudzeit dzīduot latgalīšu dzīsmis, eipaši tim, kuri namuok latgalīšu volūdu, nu atbraukuši iz Latgolu, gryb tū dzierdēt i ari īsavuiceit kaidu vuordu latgaliski.

Jaunizveiduotuo programa dūs īskotu latgalīšu kuozu tradicejuos, ticiejumūs, dūs vareibu īsavuiceit latgalīšu vuordus, kai ari dzīduot kuozu i apdzīduošonys dzīsmis.

Jaunizveiduotais karaoke disks tiks pīduovuots ari kuozu grupom, kurys apmeklej muzeju sovā laulobu dīnā, kai ari tū varēs izmontuot sevkurs muzeja apmaklātuojs.