Jau itūnedēļ sovu skaniejumu radejā “Ef-Ei”, “Divu Krastu radio” i itūgod ari “Latgales Radio” atsuoks kasnedelis radejis raidejumu cykls “Pi myusim Latgolā”, kas latvīšu/latgalīšu volūdā turpynuos atkluot vysu aktualū i interesantū Latgolys regionā.

Raidejums “Pi myusim Latgolā” sovim klauseituojim ir uzticeigs jau nu 2012. goda. Aizvadeitajā laika pūsmā tymā tics stuosteits i par kulturys nūtikšonom Latgolā, i par aktualitatem i vareibom Latgolys regionā, kai ari par Latgolā nūzeimeigim cylvākim, uzjāmumim i vītom. Paguojušajā godā raidejums brauce vaicuot Latgolys rūbežu i secynuoja, ka latgalīšu volūdu var dzierdēt daudz tuoļuok aiz kartēs nūsaceitajim rūbežim. Tyka gasteits pi rodūšu personeibu, kurys sovā daiļradē atspīgeļoj Latgolys kulturys boguoteibys, tyka satyktys ari aktivys latgalīšu saimis, leluoki i mozuoki zemnīki i uzjiemieji, kai ari apzynuoti Latgolys jaunī politiki.

Kai jau viesteits, ari itūgod ar Nacionaluos elektroniskūs plošsazinis leidzekļu padūmis atbolstu raidejums “Pi myusim Latgolā” turpynuos informēt klauseituojus par nūtikšonom i aktualitatem Latgolā, diskutēt par kulturys i socialajim procesim Latgolā, kai ari stuosteit par tim, kuri dzeivoj i struodoj Latgolā i Latgolys lobā.

“Kulturys afiša Pi myusim Latgolā”:
radejā “Ef-Ei” – catūrtdīnēs 18.30 (atkuortuojums pīktdīnēs 12.30),
“Latgales Radio” – catūrtdīnēs 18.05 (atkuortuojums pīktdīnēs 11.05).

“Vārojam, vaicojam i viertejom Pi myusim Latgolā”:
“Divu Krastu radio” – pīktdīnēs 15.30 (atkuortuojums pyrmūdīnēs 10.30),
“Latgales Radio” – pīktdīnēs 16.30 (atkuortuojums sastdīnēs 11.00).

“Eimam gostūs Pi myusim Latgolā”:
radejā “Ef-Ei” – sastdīnēs 16.00 (atkuortuojums svātdīnēs 18.00),
“Latgales Radio” – sastdīnēs 14.00 (atkuortuojums svātdīnēs 11.00).

Vysus raidejumus sevkurā laikā varēs nūsaklauseit ari LaKuGā.