Cytaidi latviskais. Pa Latgolys karūga pādim
Latgolys apceļuošonys stuostu trešuo sezona teik nūslāgta ar raidejumu par Latgolys karūgu. Tys pleivoj pi pošvaļdeibu kuormu, školu, radzams pi mašynu styklu i rūtoj suvenirus, tū jem leidza misejis karaveiri dīnejūt uorpus Latvejis rūbežu i latgalīši, kas laimi vaicoj cytur pasaulī. Tok, voi zynoms ir fakts, ka tuo idejis autors ir viesturnīks Mārs Rumaks, kurs na popularitatis, nu patriotisma i idejis aicynuots izveiduoja Latgolys karūgu, palaide tū tautuos i itūšaļt realizej biznesu, kas paleidz privatpersonom, uzjāmumim, pat saimem i kuozu svieteituojim tikt pi sevkura veida i formys karūga. Raidejuma vadeituojs, latgalīšu rakstnīks Valentins Lukaševičs izzynoj, kai struodoj uzjāmums “Baltic Flags” i kaidys idejis i nūdarbis vēļ pruotā Māram Rumakam.
Mārs i juo dzeivisbīdre Baiba, kas Kūrzemi nomainejuse pret Latgolu, izveiduojuši ari viesturiskūs rekonstrukceju klubu “Kroma kolna bruoliste”, kas pietej senejūs latgaļu tykumus, tradicejis, atjaunoj rūtys i tautys tārpus. Vēļ jim ir zyrgi i daudz lobu ideju, kai dzeivuot i justīs laimeigim Latgolā.
