“Kolnasātā” gastej komponists Andrejs Selickis. Jis kotru dīnu ar velosipedu nūbrauc vīnu i tū pošu maršrutu. Roksta muzyku, kolpoj pareizticeigūs bazneicā i kūpā ar sīvu audzynoj pīcus bārnus. Taišni tys ļaunūt apsazynuot, ka īškejai breiveibai rūbežu nav.

Andrejs Selickis roksta skaņdorbus ar latgalīšu tekstim. Juo “Šyupuļdzīsme Jēzum”, kas raksteita Latvejis Radejis koram, itūgod sajēme Latgalīšu kulturys goda bolvu “Boņuks”, taipat ari Lelū muzykys bolvu kategorejā Goda jaundorbs.

Komponists ir nu Latgolys, dzims Daugovpilī, tok dreiži saime puorsacāluse iz Uogri, piečuok iz Reigu. Tāvu, kas dzims Rēzeknē, zaudējs cīši agri, piečuok Reigys godūs sadabuojs igauņu komponista Arvo Perta telefona numeri, pīzvanejs i aizbraucs jū satikt. Arvo Perts sovā ziņā ījiems i tāva vītu, i bejs goreigais i kompozicejis školuotuojs. Niu obeju muzyka ir sūpluok ari koncertu programuos.

Vuordineicā Arņs Slobožanins i Valentins Lukaševičs runoj par vuordu, kaidā sauc vīnu nu Andreja Selicka omotim, jis ir ari regents aba bazneicys kora vadeituojs.