18. junī ostuotū reizi Ludzys piļskolnu pīskandynuos Lelais Latgaļu tiergs i Sadoncuošona Ludzā, informej sātys lopa visitludza.lv.

Ludzys piļskolnā nu 10 stuņžu sasapuļcēs omotu meistari, sātys ražuotuoji, rekonstrukcejis klubi nu Latgolys Kroma kolna i Polockys, saiminīki, doncuotuoji, dzīduotuoji i muokslinīki.

Tierga apmaklātuojim teik pīduovuota vareiba na viņ tikt pi sātys sīra i ols, nu ari pi daudz vysaidu cytu gordumu Juoņu svieteišonai. Taipat varēs nūpierkt kaidu eistu omota meistaru rūku taiseitu lītu sev voi duovonai, skaistu puči voi stuodu duorzam voi prīcai, varēs īsavuiceit kū jaunu nu meistaru, dzeivuot leidza Kroma kolna senejūs latgaļu aktivitatem voi Polockys vydslaiku ceiņu kluba ceiņom, izadoncuot ar puornūvodu deju grupom i izadzīduot kūpā ar vītejom folklorys kūpom i pyutiejim. Bārnus varēs izvyzynuot zyrgu aizjiugā voi zirdzeņa mugorā, īprīcynuot ar sātys dzeivinīku sameiļuošonu voi sātys saldiejumu.

Vokorpusē kūpā tiks īgrīzts saulis rits i zīduots saulei i gunei ar Isnaudys folklorys kūpu, kai ari kūpā ar Latgolys septeņu deju apriņču vaira par 600 jaunīšim piļsātys parka estradē nūtiks Sadoncuošona Ludzā.