23. – 25. augustā Viļānūs nūtiks pietnīciska ekspediceja “Pa Stefānijas Uļanovskas pēdām”, viestej Rēzeknis Tehnologeju akademejis puorstuovi.

Ekspediceju organizej Viļānu nūvodpietnīceibys muzejs i Viļānu nūvoda pošvaļdeiba sadarbeibā ar Rēzeknis Tehnologeju akademeju. Ekspedicejis mierkis ir apsekuot S. Uļanovskys etnografiskajā pietejumā “Lotysze Inflant polskich” pīmynātūs geografiskūs objektus, gatavejūt S. Uļanovskys pīmiņai veļteitu pasuokumu serejai, kas apjam S. Uļanovskai veļteitys ekspozicejis sagataveišonu Viļānu nūvodpietnīceibys muzejā, S. Uļanovskys etnografiskuo pietejuma “Lotysze Inflant polskich” 1. dalis sagataveišonu izdūšonai, kai ari Viļānu viesturei veļteitys gruomotys sagataveišonu i izdūšonu.

Ekspedicejā pīsadaleis Viļānu nūvodpietnīceibys muzeja i Viļānu nūvoda pošvaļdeibys izgleiteibys i kulturys dorba organizatori, Rēzeknis Tehnologeju akademejis, Pūlejis zynuotņu akademejis i Jagelonys Universitatis (Pūleja, Krakova) zynuotnīki.

Karteņā: Ekspedicejis dorba grupa (nu kairuos): Viļānu nūvoda pošvaļdeibys izgleiteibys i kulturys lītu specialiste Ilga Morozova, Viļānu nūvodpietnīceibys muzeja vadeituoja Margarita Skangale, Viļānu nūvodpietnīceibys muzeja specialiste Anna Pigaškova, Rēzeknis Tehnologeju akademejis lektors Ivars Matisovs.