Latgolys Kulturys centra izdevnīceibā izdūta kulturviesturiska i literara godagruomota “Tāvu zemes kalendars 2017”, viestej izdevnīceibys sātyslopa.

Kalendarā atrūnami roksti par lauksaimisteibys, medicinys, arheologejis, viesturis, kulturviesturis, volūdys vaicuojumim, kai ari literatura, kritika i publicistika. Kai īrosts, godagruomota pīmiņ ari īprīkšejuo goda aizguojiejus.

Viesturis sadaļā var skaiteit arheologa Jura Urtāna rokstu par Dzirkaļu piļskolnu, taipat ari Pīters Zeile roksta par Latgolys kongresa symtgadi. Vairuokus rokstus sagatavejs Valentins Edmunds Klešniks i Jūlijs Truops, kalendarā atrūnamys ari vairuokys atminis par vysaidim tematim i cylvākim, kai ari cytu autoru dorbi.

Sovūs redzīņūs par volūdu doluos Juoņs Būmanis i Paulīne Zalāne.

Literaturys sadaļā publicāti Ontona Kreica, Ingunys Būmanis-Lūsis, Voldemāra Vogula, Martys Bindukys, Jūlija Truopa, Romona Spaitāna, Normunda Dimanta, Magdalenys Vjateris, Ilzis Keišys, Laimys Ločmelis, Elvīrys Pinkys, Rūdolfa Linuža, Vilmys Lelis, Pītera Meikstuma, Marutys Avramčenko, Ilvara Speismaņa, Vitys Gulbis, Eleonorys Tjarvis i Leonarda Rakicka dorbi.