“Kolnasātys” gaška ir šova “Īstās latvju saimnieces” uzvarātuoja Ilze Stabulniece. Jei saimnīkoj vactāva caltajā sātā Kruoslovys nūvodā pi poša Boltkrīvejis rūbeža. Ilzis sirdslīta i kasdīnys nūsadorbuošona ir zyrgi. Kai stuosta poša Ilze, zyrgi ir na tik maizis peļneituoji saimei, nu ari juos draugi.

Iz zyrgu sātu “Klajumi” gosti brauc na tik apsavērt zyrgus i ar tim dūtīs izjuodēs, nu izbaudeit ari lauku klusumu pīrūbežā. “Klajumu” zyrgi pīsadola ari vysaiduokūs publiskūs pasuokumūs, ir pabejuši pat iz Daugovpiļs teatra skotivis.

Raidejumā teik īsavārts ari latgalīšu literaturā. Žurnaliste Gunta Nagle devēs satikt romana “Aizlauztais spaits” autorus Sandru Ūdri i Juoni Ryučānu, eistajā vuordā Ivaru Magazeini. Gruomota veļteita inženera, latgalīšu kulturys i sabīdriskuo darbinīka Fraņča Kempa personeibai. Gunta izvaicoj autorus par gruomotys radeišonu i tū, kai poši autori viertej Fraņča Kempa personeibu.