Myužeibā aizguojuse latgalīšu dzejneica, filologe Paulīne Zalāne. Jei dzymuse 1931. goda 21. augustā zemnīku saimē Stiernīnis pogostā. Saimis rūseibu puortrauce Ūtrais pasauļa kars, 1944. godā Zalānu saime devēs iz Vuoceju, vairuokus godus pavodūt biegļu nūmetnēs. 1951. godā Paulīne devēs iz Amerikys Savīnuotajom Vaļstim. Dzeivuodama Amerikā, Paulīne vuicejuos vuocu, franču volūdu i literaturu, senlaiku literaturu, viesturi, pedagogeju i cytys jūmys. Vacuokuo bruoļa mudynuota Paulīne dzejūļus suoka sacerēt jau deveņu godu vacumā, vuiceidamuos Stiernīnis pamatškolā. Juos pyrmuo publikaceja beja 1956. godā dzejūļs žurnalā “Dzimtenes Balss”.

Literaturkritike Ilona Salceviča par Paulīni Zalāni sovulaik rakstejuse: “P. Zalānis dzejūļūs rysynuotys cylvāka dzeivis problemys myužeibys perspektivā, tī ītvarti antologejuos “Latvijas vēsture dzejās un gleznās” (4, 1969). Publiciejuse rokstus par dainom kai latviskuo pasauļa uzskota pamatu, par puorsoku izcelsmi, par muokslinīciskuos radeišonys procesu, par latgalīšu leluokajim sabīdriskajim i kulturys darbinīkim P. Miglinīku, F. Trasunu, rakstnīku O. Rupaini.”

P. Zalāne bejuse žurnala “Treji vārti” jaunūs autoru nūdalis vadeituoja, ostoņdasmytajūs godūs radejis stacejā “Brīvā Eiropa” veiduoja raidejumus par latgalīšu literaturu. Deveņdasmytūs godu ūtrajā pusē Rēzeknis Augstškolā P. Zalāne skaiteja lekcejis.

Izvadeišona nūtiks sastdīņ, 21. aprelī, nu Stiernīnis bazneicys 12.00 stuņdēs.