Tev tys juoredz! Blogeri nu Belgejis i Vuocejis īpazeist Latgolu
Roksta autors: portals lakuga.lv
Augusta dīnuos Latgolā gasteja Bjorns Troks nu Beļgejis, projekta “The Social Traveler” dybynuotuojs. Jis vīns pots ci kūpā ar cytim ceļuojumu blogerim izzynoj turisma vītys eipašā veidā. Sadarbeibā ar vītejom turisma organizacejom Bjorns ik dīnu sajam jaunus, īprīkš nazynomus izaicynuojumus, kas juoatrysynoj, izmontojūt socialūs medeju i atsauceigu cylvāku paleidzeibu. Izmontuot ceļvežus i maklātuojprogramys nav atļauts. Ceļuojumā iz Latgolu Bjornam pīsavīnuoja bloga “Passport-diary.com” redaktors Pauls Ničke nu Vuocejis.
Kūpš projekta uzsuokšonys 2013.godā, Bjorns ir puorvariejs izaicynuojumus vairuok nikai 50 turisma vītuos. Pīmāram, Austrejā nūorganiziejs tradicionalūs tautys tārpu fotoseseju, Italejā īsavuicejs makaronu gataveišonys nūslāpumus i Fraņcejā pīsadalejs viesturiskuos bruninīku ceinys apvuiceibuos.
Latgolā Bjorns i Pauls paraudzeja tradicionalū latvīšu “sporta veidu” – sieņuošonu.
Īpazyna mistiskū Čortoka azaru Aglyunys nūvodā.
Sadzīduoja i sadoncuoja kūpā ar folklorys kūpu “Rūtoj” nu Preiļu.
Asūt Latgolā, juoparauga iteinis kulinarais montuojums, puišu aizdavums beja pagataveit buļbišnīkus.
