Konkursam “Ontona Kūkoja portfeļs” niu ir sovs logo
Roksta autors: portals lakuga.lv
Ar reikuotuoju, žurejis, daleibnīku i jūs školuotuoju attuolynuotū pasuokumu 16. aprelī nūsasliedzs J. Soikāna Ludzys muokslys školys (JSLMŠ) organizātais pyrmais konkurss “Ontona Kūkoja portfeļs”, kura aizdavums, rūsynojūt školānus īpazeit O. Kūkoja dailradi i dzeivi, beja izstruoduot sovus autordorbus – konkursa logo, kas ītvartu vuordus “Ontona Kūkoja portfeļs” i grafiskus attāluojumus, simbolus voi zeimis, kas raksturoj muokslinīka personeibu i davumu.
JSLMŠ direktore Sandra Vorkale pasateic vysim konkursa daleibnīkim, jūs školuotuojim i žurejai, par konkursa ideju soka tai: “Tymā Ontona portfelī var vysu kū puorvoduot. Cerim, ka konkurss atsakuortuos, paliks par tradicionalu. Kotru reizi “portfelī” varēs īlikt kaidu jaunu ideju voi izjimt kaidu Ontona ideju. Partū “portfeļs”.” Pats O. Kūkojs par lela izmāra sūmom stuostejs: “Pīlīkamajā div leli uodys čemodani. Sīva jūs īsaguoduoja braucīņam iz Čehoslovakeju, cereibā, atpakaļceļā pīsist ar vysvysaiduokū importu. Parkū itūreiz jī nanūdarātu muola importam iz Latgolu! Kotrā pa desmit dasom – kūpā sovi divsimt kilogrami! Leidz Reigai tys pats Pīters nūvastu.” (Piec A. Kūkoja “Mālu čemodāni” nu konkursa nūlykuma.)
Žurejis sastuovā ītylpa muokslinīki Agra Ritiņa, Māra Zīliņa, Vjačeslavs Fomins (Bitty), arhitekte Darja Koževnikova, O. Kūkoja mozmeita i LMA magistranturys studente Katrīna Kūkoja. A. Ritiņa par itū konkursu: “Itys konkurss eipašs i cytaiduoks ar tū, ka veļteits vīnam cylvākam – Ontonam Kūkojam, kurs beja ari Ludzys bārnu muokslys školys dybynuotuojs. Jis beja ari vīns nu pyrmūs munu īdvasmuotuoju iz muokslu i školuotuoju. Partū maņ beja interesanti pīsadaleit konkursa žurejā, redzēt, kai šudiņ jaunīši interpretej juo davumu. Daudzi konkursa daleibnīki ir nu Valmīrys, Olyuksnys, Reigys, īspiejams, ka jī pyrmū reizi dzierdēja O. Kūkoja vuordu. Caur itū konkursu jim beja īspieja īpazeit vīnu nu sova laika Latgolys kulturys pamatlicieju, kurs dorbuojuos daudzūs muokslys i kulturys vierzīņūs.
Par konkursa pamataizdavumu izveiduot logo daudzys školuotojis saceja, ka byus gryuši – tik daudz informacejis īlikt vīnā mozā zeimeitē, kurai vēļ juobyun vīgli uztveramai. Bet bārnim tys izadeve gona labi, beja daudz vierteigu ideju i īceru. Breineigs izavērte ari attuolynuotais rezultatu paziņuošonys pasuokums. It kai sātā viņ beju, bet sajiuta kai nu kluotīnis pasuokuma atsagrīzušai.”
Kūpā konkursam tyka īsyuteiti 159 dorbi nu 11 Latvejis školu, dorbus vērtēja treis vacuma grupuos. Jaunuokajā, 7–10 godu, vacuma grupā I vīta – Darja Beļajeva (9 godi), Reigys Zīpnīkkolna vydsškola, pedagoge Astrīda Untiķe; II vīta – Elza Krieva (9 godi), Berģu Muzykys i muokslys pamatškola, pedagoge Maija Purgaile; II vīta – Liāna Ivonna Mieze (9 godi), Kuorsovys Muzykys i muokslys škola, pedagoge Gunta Nagle; III vīta – Nikija Kovolenko (9 godi), Kuorsovys Muzykys i muokslys škola, pedagoge Gunta Nagle. Itamā grupā nu 36 dorbu nomināti tyka 14 dorbi, dorbus var apsavērt prezentacejā.
Videjā, 11–14 godu, vacuma grupā I vīta – Elza Jaunzema (12 godi), Olyuksnys Muokslys škola, pedagoge Rita Balane; II vīta – Viktorija Baikova (11 godi), Kuorsovys Muzykys i Muokslys škola, pedagoge Gunta Nagle; II vīta – Daniela Kovalāne (11 godi), Kuorsovys Muzykys i Muokslys škola, pedagoge Gunta Nagle; III vīta – Elizabete Timofejeva (13 godi), Olyuksnys Muokslys škola, pedagoge Rita Balane; III vīta – Kate Ozoliņa (12 godi), Kuorsovys Muzykys i Muokslys škola, pedagoge Gunta Nagle. Itamā grupā nu 62 dorbu nomināti tyka 16 dorbi, dorbus var apsavērt prezentacejā.
Vacuokajā, 11–14 godu, vacuma grupā I vīta – Ieva Maškanceva (17 godi), J. Soikāna Ludzys muokslys škola, pedagoge Iveta Ladusāne; II vīta – Kitija Elste (15 godi), Valmīrys Vaļsts gimnazeja, pedagoge Laila Benta; II vīta – Paula Rozīte (15 godi), Valmīrys Vaļsts gimnazeja, pedagoge Laila Benta; II vīta – Aivis Krūmiņš (17 godi), J. Eglīša Preiļu Vaļsts gimnazeja, pedagoge Anita Puncule; III vieta – Alīna Ivanova (17 godi), J. Eglīša Preiļu Vaļsts gimnazeja, pedagoge Anita Puncule; III vīta – Linda Marčenoka (16 godi), Zylupis Muzykys i muokslys škola, pedagoge Marija Sidorina. Itamā grupā nu 67 dorbu nomināti tyka 18 dorbi, dorbus var apsavērt prezentacejā.
Golvonuo bolva daškierta Elzai Jaunzemai nu Olyuksnys. Juos dorbs byus tuoļuokūs konkursu “Ontona Kūkoja portfeļs” logo.
