Rokstu sagataveja: portals lakuga.lv

Nūtikšonys par gūdu Annys dīnai, kurū svietejam 26. julī, sevkurs varēs apmeklēt jau nu 25. da pat 27. juļam vysaiduos Latgolys pusēs. Draudžu svātki, sasadzīduošonys, Annu gūdynuošona, tiergi i izstuodis – plota pasuokumu programa vysaidom gaumem. 

Bieržu bazneicys draudzis svātki

25. julī 20 stuņdēs Bolvu nūvoda Bierzpilī jau pīktū godu tiks svieteiti Bieržu Sv. Annys Romys katuoļu bazneicys draudzis svātki. Tai kai Bieržu bazneica konsekrāta Sv. Annys gūdam, Annys dīna draudzei ir eipašūs atlaidu dīna, taipat svātku misi i proceseju papyldynoj kaida Latgolys muzykanta vokora koncerts bazneicys duorzā i kūpeigais mīlasts. Draudzis vacuokuo Iveta Raciborska pīzeist, ka kūpā saīšona itymūs svātkūs – vīnkuorša pasarunuošona, pabyušona pi bazneicys – ir emocionali šmuka šaļts. Itymā godā muzykali bazneicys izpuškuotū i izgaismuotū duorzu īskandynuos “Dricānu dominante”. 

Gūds saimineicom

Rēzeknis nūvoda Nagļūs 26. juļa 14 stuņdēs pi Nagļu tautys noma nūtiks Saimineicu dīnys. Muzykali pasuokumu īskandynuos Leivuona lauku kapela “Līvenhofas muzikanti”, izastuos Kalsnovys pogosta damu deju grupa “Magnolija”, tok ar jūkim īprīcynuos Nagļu tautys noma teatris. Byus vareiba ari apsavērt damu klubeņa “Rītava” daildorbu izstuodi. 

Annys Dagdā

26. i 27. julī Dagda puorsavērss par dzeiveigu i muzykalu sasatikšonuos vītu, kur sevkurs aicynuots baudeit Latgolys tradicejis, muzyku i vosorys sajiutu. Annys dīna Dagdā vysod teik svieteita ar plotu programu, garšeigim iedīnim, daņčim, muzyku i kūpā byušonys prīcu.

26. julī nu 11 da 15 stuņžu Dagdys piļsātys skverā byus “Latgolys kulinaruo montuojuma festivals”, eipašais gosts – kontrtenors Sergejs Jēgers ar kulinarūs meistardorbu prezentaceju. Dorbuosīs ari Annys dīnys tierdzeņš. Reigys īlā sūpluok piļsātys skveram nūtiks retro mašynu paruode. Sovpus 13 stuņdēs gostu sātā “Runčuki” Ondrupinis pogostā tiks attaiseits Annys dīnys ceplis. Tī varēs vāruot malnuo muola trauku izjimšonys procesu. Dagdys muižys parka estradē 20 stuņdēs nūtiks lelkoncerts “Zeme. Laiks. Spēks” i grupys “Tautumeitas” koncerts. Vokoru nūslēgs zaļumballe ar grupu “Vietu nav”.

Saimineicu dīnys ļustis Skujetnīkūs

Bolvu nūvoda Skujetnīku cīmā 26. julī jau nu 14 stuņžu sevkurs tiks gaideits iz Annys dīnys tierdzeņu i jautrom aktivitatem saimem ar bārnim. Koncertēs pošdarbnīku kolektivi nu Bierzpiļs, Ruguoju, Kryšānu i Lozdukolna i tyks gūdynuotys Annys i Jākubi. Eipaši teik aicynuotys saimineicys pasalapnuot ar sovim prīškautim!

Annys dīna Bieržgalī

Rēzeknis nūvoda Bieržgalī 27. julī Annys dīna tiks sagadeita ar amatnīku tierdzeņu Reitupis īlā i Svātū Misi Bieržgaļa Sv. Annys Romys katuoļu bazneicā 10 stuņdēs. 10.45 tierga teritorejā varēs satikt Natālijis Gorkinys eksotiskūs deju studeju “Jasmīne”, sovpus 11.15 koncerts ar folklorys kūpu “Upīte” i Annu gūdynuošona. Paraleli svātku aktivitatis vysai saimei – atrakcejis i lelformata spielis bārnim, audumu maiseņu meistarklasis. Kulturys noma laukumā izstuode “Bērzgales stāsti” – nu pyrmsuokumu da 20. g. s. 30. godu. 

Sasadzīduošona Vabalis muižys parkā 

Par gūdu Annys dīnai Augšdaugovys nūvoda Vabalē 27. julī 13 stuņdēs Vabalis muižys parkā nūtiks sasadzīduošona kūpā ar etnografiskū ansambli “Vabalis” i ansamblim “Stiprās sievas” i “Stiprie vīri”. Pasuokumā naiztiks ari bez Annu gūdynuošonys, tradicionaluos puču izstuodis i leluos salatu bļūdys gataveišonys. Vabalis pogostā Annys dīna eipaši teik svieteita jau vaira nakai 20 godu.

Annys i Jākuba dīnys Atašīnē

Nu 25. da 27. juļa Jākubpiļs nūvoda Atašīnē jau tradicionali reizē tiks svieteita Annys i Jākuba dīna. 25. julī 19 stuņdēs “Annys sātys” pogolmā suoksīs tautys muzykantu i folklorys kūpu saīts “Atašīnis suseklis”. Itūgod saītā pīsadaleis Saunys pogosta etnografiskais ansamblis “Naktineica”, Smeļteru folklorys kūpa “Golūda”, folklorys kūpa “Rūžupis veiri”, Mātrīnys tautys muzykantu ansamblis “Ramata”, folklorys kūpa “Turki”, Dekšuoru veiru folklorys kūpa “Kūzuls”, Atašīnis tautys noma folklorys kūpa “Vīraksne”, tautys muzikanti – Tālis Karlsons (Modūne), Māris Čeičs (Reiga), Aija i Nikolajs Bogdanovi (Mežāre), Aivars i Mārteņš Cimbuli (Atašīne).

26. julī svātki suoksīs jau nu 11 stuņžu ar Annys dīnys tierdzeņu i turpynuosīs ar muzykalu programu i rodūšom aktivitatem bārnim. Nu 14 stuņžu da pat vokora svātku koncertu daļa – izastuos “Katrīna Dimanta &Zeltrači”, Veremu tautys noma VPDK “Kūzuls”, Biržu tautys noma SDK “Neķer kreņķi”, Atašīnis tautys noma doncuotuoji i Sandris Dubovs. 19.30 stuņdēs Dekteru amaterteatris aicynuos iz izruodi “Barona Bundula atsagrīzšona”. Vokoru nūslēgs balle ar Aldi Grandānu.