Rokstu sagataveja: portals lakuga.lv

Latvejis Rakstnīku savīneiba jau 60. reizi reikoj kasgadejuos Dzejis dīnys, itūreiz ar devizi “Dzeja svietej” (“Dzeja svin”). Ari itymā godā interesentim pīduovuota plota pasuokumu programa kai golvyspiļsātā, tai i regionūs. 3. septembrī Reigā 18 stuņdēs nūtiks latgalīšu i lībīšu dzejis vokors, kurā pīsadaleis latgalīšu dzejnīki – Dagneja, Raibīs i Juoņs Ryučāns.

1965. gods 11. septembrī Komunaru parkā (niu Esplanade), atzeimejūt latvīšu dzejnīka Raiņa 100. dzimšonys dīnu, tyka atkluots juo pīminieklis. Pasuokums beja sovam laikam naparosts i īdvasmojūšs, i dzejnīki tymā īraudzeja sovu vareibu uzrunuot Latveju. 1966. gods 30. martā Latvejis Rakstnīku savīneiba nūsprīde Dzejis dīnys reikuot kotru godu, tai izveidojūt jaunu tradiceju.

Dzejis dīnu pasuokumi nūteik na tik Reigā, bet vysā Latvejā. Īrosti pasuokumi ilgst apmāram 21 dīnu – nūteik kai dzejis lasejumi, tai sasatikšonys ar dzejnīkim. Itūgod Dzejis dīnys nūteik nu 28. augusta da 13. septembra. Nu 1996. gods par goda lobuokū dzejis gruomotu teik padūta Dzejis dīnu bolva, kurū itūgod padūs Latvejis Nacionalajā bibliotekā 13. septembrī 14 stuņdēs.

3. septembrī 18 stuņdēs Reigā, Tallinys kvartala bārā “conTakts”, Tallinys īlā 10 nūtiks ari latgalīšu i lībīšu dzejis vokors. Pasuokumā pīsadaleis latgalīšu dzejnīki Raibīs, Dagneja i Juoņs Ryučāns, i Igaunejis dzejnīks Karls Pajusalu, kurs sovu dzeju roksta Salacys lībīšu volūdā. Jū atdzejuos lībīšu volūdys specialists i dzejnīks Valts Ernštreits.

Daudzmuokslinīks Raibīs (Oskars Orlovs) itūšaļt aizaruovs ar komiksu serejis “Daugovpiļs bebri” zeimiešonu i ir ceļā iz sovu ūtrū dzejis kruojumu “Vysi vuordi”. Jis ari regulari pīsadola dzejis pasuokumūs kai Latvejā, tai i uorzemēs. Dzejnīks i tulkuotuojs Juoņs Ryučāns (eistajā vuordā Ivars Magazeinis), kurs ir ari diveju dzejis kruojumu autors, itūšaļt publiskūs dzejis pasuokumūs sastūpams reši, deļtuo tei ir loba vareiba jū dzierdēt i satikt kluotīnē. Sovpus literate Dagneja (Dagnija Dudarjonoka), kurai 2023. godā izguoja debejis dzejis kruojums “Ups, kūki i mes”, niu struodoj pi jauna dzejūļu kruojuma, kas byus veļteits vysaidu mīlesteibu temai. 

Dagneja itūgod izmontuoja rodūšūs rezidenču programu Lūznovys muižā i struoduoja pi sova jaunuo dzejis kruojuma, kas sauksīs “Mīleibys volūdā”. 3. septembra pasuokums jai byus vareiba pyrmū reizi skaiteit sovu dzeju Reigys klauseituojim. Dagneja pasadola sajiutuos: “Naasmu Reigys publikai skaitejuse sovus dzejūļus. Dzejis dīnys ir laiks, kod vysim pieški sasavajag dzejnīku. Es par tū drupeit smaidu. Maņ pošai pateik dzejis pasuokumi, var dzierdēt, kai autori poši skaita sovus dorbus, tuos ir jaunys sasatikšonys i īspaidi. Gaidu itū pasuokumu ar ziņkuoreibu, – kai tys vyss tiks organizāts, kaidi vēļ autori byus. I dūmoju, kaidus dzejūļus izalaseit skaiteišonai.”

Ar vysu Dzejis dīnu 2025 programu var īpasazeit sātyslopā dzejasdienas.com.