Rokstu sagataveja: portals lakuga.lv

Jau aizvadeits latgalīšu i lībīšu dzejis vokors Reigā, tok Dzejis dīnu nūtikšonys turpynuosīs vysa mieneša garumā. Portals lakuga.lv pīduovoj literarūs pasuokumu izlasi, bet cytom aktualitatem var sekuot leidza ari myusu nūtikšonu kalendara sadaļā, kas regulari teik papyldynuots.

Dzeja i muoksla sasateik Leivuonā

6. septembrī 12 stuņdēs Leivuona nūvoda Centraluo biblioteka aicynoj iz pasuokumu, kurā sasatiks vuords i kruosa “Dzīvais dzejas un mākslas laiks”. Sovu rodūšū pasauli atkluos latgaliski rokstūšuos dzejneicys Rasma Svikle-Popova i Dagneja (Dagnija Dudarjonoka), kurūs dorbūs dzeivoj Latgolys garša, dzymtuos zemis ritmi i sirds syltums. Sovpus 14 stuņdēs kūpā ar Edvardu Strazdiņu muzicēs komponists i dzejnīks Guntars Račs. Pasuokumu boguotynuos ari rodūša gleznuošonys meistarklase pīaugušajim Baibys Ārinis vadeibā i nūdarbeiba školānim Inesis Butleris vadeibā. Īīšona par breivu.

mygluojs pīsadaleis Kvīru dzejis dīnā Reigā

11. septembrī 19 stuņdēs bārā “Aleponija” (Ernesta Birznieka-Upīša īla 22) nūtiks Kvīru dzejis dīnys skaitejumi, kurūs tradicionali reikoj bīdreiba “Latvijas PEN”. Īrostai dzejis skaitejumi teik reikuoti par politiski i sociali aktualom temom, itūgod pasuokums byus veļteits kvīru dzejai, i tymā pīsadaleis Ausma Perons, Evelīna Mūrniece, Džoela Teilore, Elīna Kokareviča i Agnese Radziņa, ar performanci uzastuos Kriss Odze i mygluojs. Vokoru vadeis dzejneica Katrīna Rudzīte. Pasuokuma mierkis ir radeit drūsu telpu vysaidom pīredzem i identitatem, veicynojūt empateju i pīdareibys sajiutu. Īīšona par breivu.

Dzejis i muzykys piecpušdīne ar latgalisku dasadūršonu

12. septembrī 13 stuņdēs Preiļu nūvoda Saunys bibliotekā skanēs dzīsmis, dzeja i sarunys. Pasuokumā pīsadaleis latgalīšu dzejneica Dagneja i muzike Santa Savicka-Drozdova nu grupys “Marysana”. Īīšona par breivu.

Dzejis dīnuos Pušā aicynoj sajust dzeju

12. septembrī 18 stuņdēs Rēzeknis nūvoda Pušys tautys nomā sevkurs aicynuots iz Dzejis dīnom veļteitū pasuokumu, kurā dzeja atsadzeivuos caur vysaidom muokslys formom. Vokora programā muzike Dana Vasiļjeva aizvess klauseituojus muzykalā ceļuojumā, izpyldūt dzīsmis ar myusu dīnu latgalīšu dzejnīku vuordim. Sovpus kusteibu muokslineica Mafalda Garcia pīduovuos performanci audio ainovu pavadejumā. Taipat nūtiks ari Pušys bibliotekys apmaklātuoju dzejis skaitejumi. Īīšona par breivu.

Simboliska dzejis ražys vuokšona Rogovkā

13. septembrī 19 stuņdēs Rēzeknis nūvoda Rogovkā jau catūrtū reizi iz sasatikšonu aicynuos azartiskuo latgaliski rokstūšūs dzejnīku saceņseiba “Rogovkys dzejis voga”. Dzejis autoru uzastuošonu papyldynuos grupys “Sovvaļnīks” i vokaluos studejis “Skonai” pyrmatskaņuojumi ar pārnejuo gods slama uzvarātuoja Silvestra dzeju, kai i grupys “TKP / tā kā pērn” uzastuošona.

Muzykalys dzejis reitiškys Pleikšņu kolnā

Rēzeknis nūvoda Pleikšņūs 13. septembrī 11 stuņdēs nu reita aicynoj iz ūtrajom muzykalajom dzejis reitiškom “Gulguošona”, kur ar skaitejumim pīsadaleis literati Ilze Sperga, Silvestrs, Līvija Līpdryvīte i Evija Piebalga, bet ar muzyku reitu pīpiļdeis arfiste Elizabeta Lāce i grupa “TKP / tā kā pērn”. Pasuokums pyrmū reizi nūtyka 2024. godā, suocūt jaunu tradiceju – Rogovkys dzejis slama dīnā vareibu dzierdēt ari īprīškejuo gods uzvarātuoja, kai i cytu literatu dorbus nasteidzeigā nūskaņā ar skaistu skotu iz Rēzekni.

Sasatikšona ar Līviju Līpdryvīti Saļņovā

17. septembrī 13 stuņdēs Ludzys nūvoda Saļnovys bibliotekā nūtiks sasatikšona “Ļauj dzejai ziedēt” ar dzejneicu Līviju Līpdryvīti. Autore da šam izdavuse deveņus dzejūļu kruojumus i itūgod tur nūceju izdūt ari dasmytū.

Meilys ailis festivalā “Upītes uobeļduorzs”

20. septembrī 18 stuņdēs Bolvu nūvoda Upītē vacuokais latgalīšu festivals pasaulē aicynoj iz pasuokumu “Upītes uobeļduorzs”. Tys ir vīneigais festivals, kurs kotru godu puļcej latgalīšu literatus i muzikus, īpazeistynojūt i ar jaunim vuordim latgalīšu kulturā, i aicynojūt latgalīšu muzyku i literaturu atkluot sevkuram interesentam. Itūgod muzykalū prīšknasumu storplaikūs sovus dorbus skaiteis Ineta Atpile-Jugane, Mārīte Slišāne, Rasma Svikle-Popova, Ilze Sperga, Annele Slišāne, Gunta Ločmele, Inga Kaļva-Minina, Dagneja, Evika Muizniece, Silvestrs Solovjevs i Valdis Vucāns.