Rokstu sagataveja: portals lakuga.lv

Itymā nedeļgolā, 20. septembrī, sevkurs teik aicynuots pīsavīnuot nūsvieteit Sakstagola pogosta folklorys kūpys “Kolnasāta” 30 godu i Leivuona folklorys kūpys “Ceiruleits” 35 godu dorbuošonuos jubilejis. Folklorys kūpys izdzīduos na tik pošu īmeiļuotys sovys pusis dzīsmis, bet ir aicynuojušys iz svineibom ari sovu draugu kolektivus.

Folklorys kūpys “Kolnasāta” 30 darbeibys godu jubilejis pasuokums “Muns stuosts, muna dzīsme”

20. septembrī Rēzeknis nūvoda Sakstagola pogostā, Fraņča Trasuna muzejā “Kolnasāta”, 14 stuņdēs sovys darbeibys 30 godu jubileju svieteis Sakstagola pogosta folklorys kūpa “Kolnasāta”. Tei sovu darbeibu suokuse 1995. gods 31. oktobrī muzeja paspuornē, deļtuo ari izalaseits taids nūsaukums. Folklorys kūpa “Kolnasāta” sovys darbeibys stuostu izdzīduos skaistuokajuos latgalīšu tautys dzīsmēs kūpā ar draugu kolektivim nu vysaidu Latgolys pogostu. Svineibuos pīsadaleis Drycānu pogosta kulturys noma folklorys ansamblis “Bolta vīšņa”, Nautrānu pogosta etnografiskais ansamblis “Rogovka”, Mežavydu tautys noma folklorys kūpa, Bieržgaļa folklorys kūpa, Gaļānu kulturys noma folklorys kūpa “Vydsmuiža”, Dekšuoru veiru folklorys kūpa “Kūzuls” i Muokūņkolna pogosta tautys noma folklorys kūpa. Byus gosti ari nu Jelgovys nūvoda Jaunsvirlaukys pogosta – folklorys kūpa “Liepāre”. 

Eipaši aicynuoti ir ari folklorys kūpys “Kolnasāta” bejušī dzīduotuoji. Īīšona pasuokumā bez moksys.

Folklorys kūpa “Ceiruleits” aicynoj iz 35 godu jubilejis koncertu

20. septembrī Leivuona nūvoda kulturys centrā 18 stuņdēs iz sovu 35 godu jubilejis koncertu aicynoj folklorys kūpa “Ceiruleits”. Kūpa dybynuota 1990. godā, i tuos miseja ir tautys tradiceju izzynuošona, vuiceišonuos i populariziešona tuoļuok. Folklorys kūpa regulari izastuoj vysaidūs koncertūs i festivalūs na tik Latvejā, bet ari uorzemēs – Baļtejis vaļstīs, Pūlejā, Vuocejā, Suomejā, Italejā, Zvīdrejā, Venecuelā i c.

Jubilejis koncertā skanēs nu vītejūs teicieju pīraksteituos dzīsmis, melodejis, daņči i stuosti. Iz skotivis kuops ari “Ceiruleiša” draugu kolektivi – Aglyunys vydsškolys folklorys kūpa “Žibacteņa”, Rībeņu vydsškolys folklorys kūpa “Jumalāni”, folklorys kūpa “Rūžupis veiri”, Vuorkovys pamatškolys folklorys kūpa “Vuolyudzeite”, folklorys kūpa “Turki”, Atašīnis tautys noma folklorys kūpa “Vīraksne” i folklorys kūpa “Kokle” nu Reigys.

Piec koncerta byus sasadoncuošona i sasadzīduošona. Īīšona pasuokumā bez moksys.